Siman pasa ArenaPoliti.co a publica un articulo cubriendo e prome parti di un combersacion cu parlamentario Glenbert Croes (MEP). Den e prome parti, sr. Croes a contesta e pregunta cu a inicia e combersacion; 'Ki hustificacion tin pa exigi retiro di un Gabinete cu a haya 33.103 voto?'. Den e di dos parti, e tema di manifestacionnan ta wordo trata. No solamente esunnan cu a tuma luga durante 2014, pero tambe loke e parlamentario ta premira pa 2015. Y kico mester ta a siguiente paso si e manifestacionnan logra nan meta?

Sigui lesa pa haya sa mas den e di dos parti di e combersacion entre sr. Glenbert Croes y ArenaPoliti.co.

Mas Manifestacion
Continuando e combersacion, ArenaPoliti.co a puntra e parlamentario si e ta premira mas manifestacion pa aña 2015. Sr. Croes: “100%. Nan lo bay bira mas, y mas grandi. Den cantidad lo bay tin mas manifestacion, y lo bay tin manifestacionnan mas grandi tambe. Pasobra e medidanan cu ta bay bin.... we haven’t seen nothing yet.”

Segun Glenbert Croes, nunca antes e gastonan y debe di pais Aruba tabata na e nivel cu e ta awo. E ta sigui splica cu, segun CFT, kisas te na aña 2040 Aruba por yega bek na e nivel di debe di 2009. “Bo ta papiando di 26 aña cu un pais mester pasa door di schuldsanering, control di gasto, consciencia politico social, responsabilidad politico, pa no duna niun espacio mas na cosnan cu no ta pasa door di ‘beugelsnan’ di un deugdelijk financieel beleid den interes di un pais.”
Haciendo un pregunta y dunando su contesta dibiaha, sr. Croes ta puntra: “Ken ta paga e prijs di e problema aki, di e solucion? Pueblo. Pueblo no tabata tin culpa, ni arte ni parte den e maneho di su placa di belasting, pero pueblo si ta paga e prijs di e foutnan di e gobierno aki.” Un situacion cu segun sr. Croes ta hopi inhusto pa pueblo.

Glenbert Croes tambe ta referi na e acuerdo pa presupuesto 2015 cu Gabinete Mike Eman 2 a haci cu Hulanda pa baha e deficit pa 0,5% na 2017. Sr. Croes ta menciona cifra di un deficit di 9% pa 2014, na un suma di 443 miyon Florin, cu lo mester baha te na 0,5% pa aki 2 aña. “Sea bo ta bay haya e placa di medidanan pa aumenta entrada, of bo ta bay corta… that’s going to be very painful”. Y e parlamentario ta convenci cu e medidanan cu ta na caminda lo pone pueblo subi caya. “Nan ta bay subi caya no tanto paso nan ta fan di MEP of, whoever. No, nan t’ey subi caya pasobra e medidanan ta cruel y ta corta den nan biba como famia y como ciudadano.”

“Frente Nacional”
ArenaPoliti.co ta puntra si partido MEP lo organisa nan propio manifestacion durante aña 2015. Sr. Croes: “Nos kier ta parti di un frente nacional di partidonan politico, sindicatonan civil, nos kier ta parti di un ‘nationale front’, paso Aruba no ta di MEP, Aruba no ta di un sindicato en particular, Aruba ta di nos tur, nos tur mester make the effort. E no ta make sense pa sindicato so make the effort, partidonan so make the effort, gruponan civil so make the effort, gremionan so make the effort, no, conhuntamente. Si berdaderamente nos ta stima nos pais... dien e algemeen belang di nos pais, nos ta actua en conhunto contra un di e inhusticianan di mas grandi cu a yeg’i wordo cometi den historia di nos pais.”

Union?
Despues di a scucha sr. Croes menciona cu MEP kier forma parti di un frente nacional cu (entre otro) diferente partido politico, ArenaPoliti.co ta cuestiona si berdaderamente tin union entre e partidonan di oposicion. Riba e pregunta si tin un falta di union entre partidonan den oposicion, Glenbert Croes ta contesta: “No al contrario… Mi tin respet halto pa PDR. Den oposicion aworaki bo tin MEP y PDR…” Interumpiendo sr. Croes, ArenaPoliti.co ta puntra “Y esunnan [partidonan] pafo di parlamento?” Sr. Croes: “Esunnan pafo di parlamento mi no tin contacto cu nan, honestamente, pero nos tin hopi respet pa partido Democracia Real y su lider Andin Bikker.”

“Schouder cu Schouder”
Durante e combersacion tambe a papia di manifestacionnan cu a tuma luga durante aña 2014. Segun Glenbert Croes, loke no a haci nan un ‘exito total’ ainda, ta e hecho cu no a haya sosten di mas gremionan sindical y comercial. E ta bisa cu ya caba varios sindicato a uni den e pensamento cu mester bin un esfuerzo nacional pa baha gobierno, pero tambe tin gremionan cu tin miedo pa uni contra Gabinete Mike Eman 2. “Mi ta kere e hecho cu nos no a logra ainda [pa] baha e gobierno aki ta pasobra, berdad, falta union, pero no union den e partidonan den oposicion, [sino] union na nivel di gremionan comercial, gremionan sindical, gruponan civil di presion, y partidonan. E hecho cu gremionan tin miedo pa haya un tinte politico si nan mester uni den un frente nacional... ta refleha kortzichtigheid, pasobra e algemeen belang mester wordo gediend. Tin dado [momento] nos tur mester para schouder cu schouder cu otro pa logra un meta den interes general di Aruba. Mi ta kere e interes general di Aruba mester 'weeg zwaarder dan' cualkier kortzichtigheid of interes di e momentonan ey... Mi ta haye kortzichtigheid, tenchi largo, cu ta perhudica cu e algemeen belang di Aruba wordo gediend.”

Si gobierno entrega su retiro… what’s next?
Finalisando, ArenaPoliti.co a puntra sr. Croes kico lo mester ta e siguiente paso si e manifestacionnan logra pone suficiente presion, resultando den entregamento di retiro di Gabinete Mike Eman 2. Sr. Croes ta duna su opinion personal: “E meta ta; e gobierno aki mester bay. Whatever comes after, sea ta un eleccion of un zakenkabinet, ta hopi mas miho cu e gobierno aki keda, cu ta esunnan responsabel pa hinca nos den e problemanan aki, y cu no ta demostrando ‘real intent’ pa coregi nan errornan.” Segun sr. Croes, Aruba mester di un gobierno cu ta ehecuta un maneho di schuldsanering cu ta baha e consequencianan di e nivel di debe cu a wordo crea. Y e ta enfatisa cu, pa yega eynan, e gobierno actual mester entrega su retiro. “Whatever comes [after], is much better. It can not be worse than what we have now.”

Expresionnan haci den e articulo aki no necesariamente ta refleha opinion di ArenaPoliti.co