Ayera den parlamento a bolbe tuma lugar un suceso hopi serio y alavez hopi lamentable y condenabel. Tawata na momento cu presidente di parlamento Sra Marislo Lopez Tromp a bai cuestiona un punto di agenda riba un reunion di comision central di parlamento. E unico punto di agenda cu tawata tin pa e reunion aki tawata pa fiha un fecha pa trata e ley pa prohibi uso di saconan di plastic. Miembronan di fraccion di AVP kier a pone un punto mas riba e agenda cual tawata algun cambio den viahenan. Fraccion di AVP ta conoci pa tin un frequent flyer program y e anja aki e budget di parlamento pa anja 2016 lo caba pa luna de September 2016 segun presidente di parlamento. Aki nan Sra Lopez Tromp a bisa  Sr Dammers cu e NO lo para responsabel si surpara e presupuesto di viahamento. Sra Lopez Tromp a bisa cu Dammers a ‘’juk’’ e presupuesto di parlamento.

Esaki ta loke presidente di parlamento a trece dilanti cu NO tin espacio pa haci mas viahe di placer y mester tene cuenta cu e ta para responsabel si mester surpasa e presupuesto aki. Ora a trece esaki dilanti a surgi un discusion masha mahos cu a caba cu palabranan masha ofensivo cu a wordo dirigi den direccion di presidente di parlamento y e situacion aki a sali completamente for di man.

Segun sra Lopez Tromp e lo wordo golpia y haya 2 mokete den su cara di Chris Dammers. Di otro banda Sr Dammers ta bisa cu ta sra Lopez Tromp lo a dal e 2 mokete y cu e no a dale bek sino mas bien a wante y pushe. Hecho ta cu tur 2 a confirma y admiti cu tawata tin agresion fysico den sala di parlamento.  Consequentemente sra Lopez Tromp Y sr Dammers a entrega keho contra otro na landsrecherche. Loke nos ta condena si ta e hecho cu Sr Dammers a dicidi di pone man riba un dama y ataka esaki fysicamente. Nada ta duna un hende homber motibo pa mishi cu un dama y esaki simplemente ta ‘’not done’’. Loke nos ta condena y ta inacceptabel ta e comportacion di Sr Dammers den parlamento. E la falta respet pa su mes, e la falta respet pa nos Parlamento, e la falta respet pa nos pueblo y e la falta respet pa un dama den sala di pueblo. Ta un berguenza cu miembronan di parlamento ta comporta nan mes asina aki. Loke a sosode ta algo hopi serio y no por keda sin tin consequencia. Fraccion di AVP awe envez di condena e hecho cu Dammers a dal un hende muher mas bien ta laba man manera Pontius Pilatus y kier bisa cu tur 2 ta fout y kier get away cu un simple disculpa na pueblo.

E pregunta principal den esaki ta, unda Mike Eman mes ta? Kiko Mike Eman su opinion ta riba loke a sosode den parlamento awe? Kiko Mike Eman ta bai haci cu su parlamentario cu a dal un dama den sala di parlamento? Mike Eman ta aproba aggression verbal y aggression fysico manera a sosode den sala di parlamento? Fraccion di AVP cu ta consisti di yen di dama ta aproba abuso fysico contra hende muhernan? Keda keto NO ta un opcion! Sea AVP ta aproba abuso fysico contra hende muher of ta desaproba esaki!!

No ta promer biaha miembronan di fraccion di AVP ta abusa verbalmente di presidente di parlamento. Den pasado lider di fraccion tambe a insulta y ofende Sra Lopez Tromp na un forma masha mahos y bergonzoso. E mesun lider di fraccion berde a lastra su colega den gang na parlamento. Nos no mester lubida esaki ta e hendenan cu ta representa nos pueblo. Nan ta esnan cu ta sostene e gobierno di mas malo den historia di nos pais.

Nos ta spera cu accionan lo wordo tuma pa loke sosode pasobra abuso fysico contra un dama ta algo condenabel y serio. Nos no kier ni pensa cu Mike Eman lo kier hinka e caso aki den ‘’doofpot’’ pasobra ta su hendenan. AVP a percura pa un decadencia di nos parlamento, un decadencia den nos gobierno y un decadencia di nos pais.

Esun cu ta responsabel pa e decadencia aki ta Mike Eman pasobra e nunca a actua riba cosnan cu ta pasando. Su mesun coleganan den conseho di minister ta haci y deshaci cune y e ta kedo keto y te prefer di ta ausente cu tuma accion! Si Mike Eman no por controla su hendenan y su gobierno e mester entrega retiro pa no causa mas danjo cu ja caba nan a causa! Cu e suceso den parlamento AVP a hit ‘’Rock Bottom’’.

Expresionnan haci den e articulo aki no necesariamente ta refleha opinion di ArenaPoliti.co