Agreshon contra ser femenino no ta acceptabel bow ningun circumstancia. 

Ta di lamenta cu e lider di partido di AVP, esta Promer Minister sr. Mike Eman, no a premira y interveni referente e diferencia di opinion cu a causa e polemica den Parlamento entre sr. Dammers y sra. Lopez-Tromp, cual diferencia di opinion ta bibando pa basta dia caba. Esey ta mustra un bes mas e ausencia di sr. Eman como lider kende a scohe pa ta mas den exterior cu e ta na Aruba y ora e ta na Aruba rara bes e ta bin Parlamento. Su ausencia y falta di liderasgo bien por ta e rais di e frustracion y falta di comunicashon cu a hiba na sorto di incidentenan lamentabel asina.

En todo caso di loke por a observa y scucha di e actuashon violento y expressionan ofensivo di parti di sr. Chris Dammers durante e suseso, esey no ta manera di trata un ser femenino. Ningun tipo di splicashon di parti di sr. Dammers lo por justifica un trato asina ora ta trata di un ser femenino. Pues PDR ta kere cu sr. Dammers lo haci bon di por lo menos ofrece su disculpa y reflexiona profundamente riba su posishon.

Mas aleuw PDR por a constata cu un bes mas e imagen di Parlamento den su totalidad a wordo poni de un lus menos bunita, cual ta kita atenshon for di e trabow crucial di Parlamento, esta controla Gobierno como e organo co-legislador cu ta representa e digno Pueblo di Aruba. Lamentablemente no ta prome biaha cu e nviel den Parlamento ta laga di desea. PDR a mustra varios biaha riba esaki y aunke fraccion di PDR no ta participe den rebaha e nivel di ruenionan, e refleho ta riba Parlamento den su totalidad.

Expresionnan haci den e articulo aki no necesariamente ta refleha opinion di ArenaPoliti.co