Parlamento di Aruba a bolbe conoce un dia scur den cual Pueblo por tabata testigo di un acto condenabel contra Presidente di Parlamento na unda cu ela keda agredi pa Parlamentario Dammers, manera a keda treci dilanti pa e propio Presidente. Nos ta condena y lamenta e susedido aki. Ningun hende tin derecho pa hisa man dal su collega di trabou, tampoco no ta normal pa un collega masculino dal un collega femenino. Esaki ta algo inaceptabel. Y mas cu claro nos democracia no ta keda sirbi na momento cu den e organo di mas halto di control na nos Pais surgi un pleito cu ta caba na agrecion fysico di un Parlamentario of e Presidente di Parlamento mes.

Dos midi
E ta un berguensa cu nos Parlamento mester yega na e nivel asina abou aki. Na nos opinion no tin nada cu por hustifica e agrecion aki contra un hende muher na pia di trabou. Sinembargo locual ta sorprende nos ta, cu den e caso aki cu agresion fysico den Parlamento di Aruba, Presidente di Parlamento a opta pa no yama Polis pa saca Parlamentario Dammers pafor di Sala of e edificio di Parlamento. E ta strania nos, ya cu dia nos a hisa nos stem durante un reunion publico, Presidente di Parlamento a core yama Polis pa asina saca mi persona for di Sala di Parlamento. Pero awe cu Parlamentario Dammers, segun e Presidente mes a declara, a agredie door di dale un mokete na su cachete, no a yama Polis pa saca e Parlamentario aki afor. Kizas pasobra nan ta collega di partido no a yama Polis? Ta parce cu ta midi cu dos midi.

No hinca e caso den doofpot
Con cu sea, nos ta condena e susedido lamentabel aki den Parlamento di Aruba. Nos ta spera cu e agresion contra Presidente di Parlamento wordo debidamente investiga y cu e caso aki no wordo hinca tambe den doofpot. Pasobra cada ves ta yega na nos conocemento casonan di pleito cu ta hiba na agrecion entre e ministernan y coordinadornan cu despues bou orden di Minister Eman lo ta wordo hinca den doofpot. Nos ta spera cu e biaha aki Minister Eman no bay hinca e caso condenabel aki tambe den doofpot.

25 mei 2016

Expresionnan haci den e articulo aki no necesariamente ta refleha opinion di ArenaPoliti.co