STA CRUZ – Cu asombro partido MEP a tuma nota di e reaccion fofo di fraccion di AVP cu ta “distancia” nan mes di e abuso contra hende muher den Parlamento.
Bo por “distancia” ora ta trata cosnan leve, pero ora ta trata abuso contra hende muher, distancia NO ta un opcion. Acaso den un pareha, si e hende homber ta bati e hende muher, como famia bo por simplemente bisa bo ta “distancia”? Claro cu no! Bo ta condena, y bo ta tuma accion!
Awor den Fraccion di AVP miedo a dal nan y nan a bira NI CARNI NI PISCA.
Ta kiko e hende muhernan den e fraccion ey ta bisa? Jennifer Arends-Reyes ta “distancia” su mes di e mokete cu nan a dal su colega? Mervin Wyatt-Ras cu a bai guera hunto cu Marisol Lopez-Tromp ta simplemente “distancia” su mes di e agresion ey? Mayan ora ta trata di abuso sexual di menor, tambe nan ta bai simplemente “distancia” nan mes?
Den e caso aki bo no por simplemente “distancia”, como politico, como representante di pueblo, bo mester tuma un posicion: sea bo ta CONDENA e mokete den cara di Marisol Lopez-Tromp of e pusha den pecho di Marisol Lopez-Tromp, sea bo ta APROBA.
Keda keto No ta un opcion, pasobra keda keto y “distancia” ta mescos cu APROBA. Pues e pregunta ta: Jennifer, Mervin, Michelle, Clariska, Desiree y Lorna ta bai CONDENA e violencia fisico contra Marisol Lopez-Tromp, of nan ta keda keto, “distancia” y APROBA” e violencia contra Marisol Lopez-Tromp?
Den bida tin biaha bo mester tuma un posicion, maske con dificil e ta. Hende homber den un caso asina por scohe cobardemente di “distancia” nan mes, pero como hende muher bo no por hasi esey. Si bo “distancia” bo mes, kiermeen cu bo ta APROBA cu bo colega a wordo pusha of moketia. Y den e caso ey esaki ta hasi henter e partido AVP un partido CONTRA HENDE MUHER!

Expresionnan haci den e articulo aki no necesariamente ta refleha opinion di ArenaPoliti.co