ORANJESTAD -- Parlamento dialuna a trata e proyecto di Green Corridor. E promer cos cu tabata obvio ta cu ningun hende tin informacionnan concreto.
Na prome lugar tin e autorisacion cu Minister a haya na 2011 pa un maximo di 292 miyon florin.
Despues Banco Central a publica cu pueblo mester bai paga bek 29.3 miyon pa 25 anja, cu ta duna un total di 732.5 miyon florin.
Durante reunion publico e minister a bisa cu Banco Central a mal informa Parlamento. Y segun e minister locual CFT a bisa tampoco ta corecto. "Esey ta pa prome biaha cu nan ta bin cu algo asina. Desde december cu e cifranan ey a wordo publica ningun hende a contradesi nan. Ningun momento e minister a sali bisa cu nan no ta corecto. Anto awor cu ela haye den problema, e ta core bisa cu e cifranan no ta corecto pero no ta mustra kiko si nan mester ta. Bo no por tuma un hende asina na serio.
Mi ta lamenta cu e minister y su coleganan di fraccion di AVP a recuri na algo asi a baho di ataca Banco Central di e forma ey. Mas aun mirando cu nan ta hasi esaki djis pa scapa cara di e minister.
Esaki ta un momento hopi scur den historia di nos parlamento pasobra bo por ta di acuerdo of no cu institutonan manera Banco Central, pero hamas bo por bai asina leew pa ataca e Banco di e forma ey sin duna nan un oportunidad pa defende nan mes. Nos a pidi pa Banco Central bin duna Parlamento su pensamento riba esaki" lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co