Pueblo di Aruba, mayoria di e parlamentarionan hunto cu e ministernan di partido AVP a duna comentario cu e ley di CAFT cu a wordo acepta den Parlamento di Aruba dia 27 augustus ultimo, no tin medida aden. Esaki ta berdad! Den esaki, esnan di AVP ta papiando e berdad. Pero, locual esnan di AVP ta keda sin bisa ta cu pa medio di e ley aki, gobierno Hulandes via CFT a haya supervision completo riba e situacion financiero gubernamental di pais Aruba. Den e ley, 21 biaha e gobierno Hulandes ta wordo menciona. Tambe e palabra “aanwijzing” cu ta significa indicacion mandatorio ta wordo menciona 13 biaha. Un apoderacion completo di parti di gobierno di Aruba na gobierno Hulandes. Concecuentemente, ban hunto pa busca e pruebanan cu posiblemente mester bini un paquete grandi di medida financiero riba e pueblo di Aruba, a consecuencia di dicho ley!
Uno, mi persona a manda puntra sr. Minister Plasterk con comprometedor, huridicamente mira, e palabracionnan firma dia 2 mei 2015, entre gobierno di Aruba y gobierno di Hulanda ta?
Minister Plasterk, pa medio di dr. mr. E.J. (Erwin) Arkenbout kende ta director Koninkrijksrelaties BZK, a manda contesta mi persona, cu encuanto e palabracionnan entre e dos paisnan relaciona cu e finansas publico di Aruba, encuanto e situacion financiero, ta completamente valido y aplicabel pa tur dos gobierno. Alaves e ta informa mi cu e contesta aki ta den concordancia cu su contesta tambe na Tweede Kamer na Hulanda! Alaves, cu recientemente Parlamento di Aruba a acepta e ley di supervision financiero.
Dos, siendo cu e protocol di dia 2 mei 2015 ta keda completamente vigente, mester averigua cua parti di dje por ta papiando di medida comprometedor. Den e protocol tin acorda y firma, via artikel 3 ta skirbi, cu tur e recomendacionnan (aanbevelingen) duna door di CFT dia 29 december 2014, mester bira medidanan bon funda, concreto y sin inconveniencia (‘concrete en deugdelijk onderbouwde maatregelen’).
Tres, ora bo analisa e recomendacionnan di CFT di 29 december 2014, bo ta encontra riba pagina 7 un lista cu 24 medida riba dje, di cual TUR mester wordo implementa door cu Parlamento di Aruba a acepta e ley di supervision financiero. Uitgavenverlagende maatregelen (medida): Na 2015, 281,4 miyon florin. Na 2016, 349,7 miyon florin. Na 2017, 412,9 miyon florin. Na 2018, 465,1 miyon florin. Tur esaki for di e cartera di e pueblo trahador na Aruba. Akinan no ta cuestion di interpretacion sino di asina e cos mester bay, si no aanwijzing! Sr. Bermudez tambe ta tira santo den wowo di pueblo bisando cu CAFT ta un ley di caracter instrumental y no un ley di maneho. Atrobe e mesun perfil di manipulacion cu tur esnan di partido AVP. E ley ta di caracter instrumental pero e ley ta indica y dicta con e maneho MESTER tuma lugar desde 1 augustus 2015 y padilanti. NO tin un time limit na dje tampoco manera e Tata di Mentira a bisa den Parlamento. Simplemente esaki ta pa gobierno di Aruba complace y evita di haya e doloroso AMvRB (KB) for di gobierno Hulandes. Asina e propio Tata di Mentira a declara na prensa pafor di Parlamento. Resumiendo tur loke ta ariba menciona, pueblo di Aruba por comprende, cu gobierno di AVP a opta di castiga e pueblo di Aruba como consecuencia di mal gobernacion na lugar di entrega retiro?

Expresionnan haci den e articulo aki no necesariamente ta refleha opinion di ArenaPoliti.co