Netamente loke promer minister Mike Eman a bin ta haci y a hinca Aruba den problema te cu Reino a impone CAFT 

Diaberna ultimo e minister di finansas di Alemania, un di e economianan cu tin Union Europeo na bida, a declara cu e maneho di print of fia placa pa crece economia probablemente lo trece e proximo crisis financiero cune. Apenas mundo ta recuperando di e crisis mundial di 2008 y ja awo e proximo crisis ta vislumbrando dor di manehonan similar di endeuda pais cual Mike Eman a bin ta aplicando pa Aruba, y cual a pone nos den asina tanto problema te perde nos autonomia financiero.

Un par di siman pasa ainda Mike Eman ta gaba (!) cu e ta kere den e tipo di endeudamento ey cu a mara generacionan pa bin, y awo ta resulta un bes mas cu e maneho ey no ta responsabel ni duradero.

Nos di PDR varios biaha a expresa cu nos no ta kere den e maneho di AVP di a endeuda nos pais mande na rand di bancarota pa crea un crecemento economico fictisio y temporal: ta mescos bo mes bay cumpra cu bo credit card den bo propio tienda pa bisa na final di dia cu benta a bay bon!
PDR ta kere den stimulo economico real, sin cu mester endeuda e pais. Lamentablemente ta parce cu Gobierno actual no ta haciendo nada pa stimula nos economia realmente, proyectonan ta tranca pa via di obstaculonan innecesario y incertidumbre pa por inverti na Aruba, y e leynan fiscal ainda ta hopi anticua cu tarifanan disproporcionalmente halto. Tur esaki caminda cu e unico pilar cu nos a resta ta conoce retonan grandi, manera e hecho cu vuelonan diario pa Cuba desde Merca ta bay inicia.

Ley di recuperacion economico
PDR semper a propone pa introduci un ley manera e “Crisis- en Herstelwet” na Hulanda, esta un ley pa enfrenta crisis y stimula recuperacion economico caminda cu ta kita obstaculonan innecesario pa por inverti den e economia y crea cuponan di trabow. Un otro aspecto cu por ehempel mester evalua ta e efectividad di impuesto riba dividendo: manera hopi experto a expresa mester evalua si no mester rebaha esaki paso tin hopi liquidez cu ta wordo reteni cu por wordo usa pa stimula inversion: capital para no ta yuda economia y no ta crea cuponan di trabow.

Expresionnan haci den e articulo aki no necesariamente ta refleha opinion di ArenaPoliti.co