Oranjestad - Aruba, 24 Februari 2016: Minister di Finanzas, Angel Bermudez y Departamento di Aduana a entrega recientemente 11 certificado di "Risk Management y Asycuda" na diferente miembro di aduana cu a completa e curso esencial aki di 2 siman ademas di e "Voluntary Compliance Program" (VCP) cu tambe a forma parti di e curso.

Sr. Terrence Leonard, ex hefe di Aduana di St. Lucia y actualmente specialista den tereno di Risk Management na United Nations Conference on Trade and Development (UNCTAD) a duna e curso aki na e duaneronan di Aruba y a manifesta cu e tabata hopi impresiona cu e miembronan di e cuerpo aki den comparacion cu demas Departamento di Aduana den Caribe, pues e participantenan a demostra un nivel halto di conocemento, experiencia y motivacion pa sigui mehora e nivel di e departamento aki. 

Di otro banda Minister Bermudez tambe ta sumamente satisfecho cu a logra realisa e curso aki pues segun informacion y cifranan cu Sr. Leonard mes a comparti di otro paisnan manera Trinidad & Tobago y Belize cu actualmente ta uzando e sistema di VCP, e implementacion y ehecucion a resulta hopi beneficioso y ademas por a tuma nota di e diferencia grandi den efectividad y tambe den entrada pa caha di Gobierno.

E miembronan cu a participa y finalisa e curso aki ta forma parti di diferente departamento di Aduana manera, 'Douane Controle Team', Waf, 'Douane Recherche', 'Asycuda' y 'Risk Management' mes, "Esaki ta haci cu e trabou den ekipo ta wordo realisa efectivamente y cu miho resultado tambe", a mandatario a indica. Nan a wordu entrena con pa profila mas optimalmente e riesgonan existente durante e proceso di importacion. Redusiendo esakinan ta aumenta e entrada pa gobierno, ja cu ta wordu kobra loke mester wordu paga según leynan vigente!

Segun informacion di Minister Bermudez y Director di Departamento di Aduana, Sr. Ricky Croes, a keda confirma cu pa 1 di Maart venidero, lo inicia oficialmente cu e fase piloto di e "Voluntary Compliance Program" caminda cu e diferente empresa y comerciantenan lo ricibi un cualificacion a base di nan cumplimento cu e procedemento y leynan di aduana. Den e caso cu e empresa of comerciante ricibi un cualificacion positivo, nan lo ricibi un trato preferencial na momento di saca nan mercancia. Asina ey e cuerpo di duana ta hanja mas tempo pa verifica efectivamente esnan ku no ta kumpli cabalmente ku reglanan di ley di importacion.

Minister Bermudez ta felicita e duaneronan cu a finalisa e curso aki di 'Risk Management', 'Asycuda' y 'VCP' un biaha mas y ta desea nan tur clase di exito den nan trabou y e prome fase di VCP cu lo inicia na Maart. "Mi ta hopi orguyoso cu nos cuerpo di aduana ta conta cu profesionalnan cu ta sigui expande nan conocemento y na mes momento ta hisa e nivel di e departamento aki" asina e mandatario a expresa.
Hunto ku e equip nobo ku nos ta invertiendo aden y tecnologia avansa, nos cuerpo lo sa di hasi mas ku menos!

Expresionnan haci den e articulo aki no necesariamente ta refleha opinion di ArenaPoliti.co