Su pago ta inclui den e Presupuesto balansa cu ta bay logra

ORANJESTAD – Minister Benny Sevinger, encarga cu asuntonan di Infrastructura, den un conferencia di prensa a expresa orguyo di ta forma parti di un gobernacion cu ta logra ehecuta cuatro proyecto grandi cu tabatin 30 aña wardando riba nan ehecucion.

Ta trata di Green Corridor, Watty Vos Blvd, Renobacion y Ampliacion Hospital y Mudamento di Waf  di Carga pa Barcadera. Cuatro proyecto grandi cu ta den realisacion.

Minister Sevinger a splica cu construccion di e proyecto Green Corridor tin un duracion di dos aña y mey, ya cu a realisa algun parti caba, manera e rotonde banda di aeropuerto ta inicio di tanto Watty Vos Blvd como Green Corridor y a haci e conexion entre Green Corridor y e parti cu ta bay pa waf di Barcadera.  Solamente falta pa conect’e riba e rotonde nobo eynan. E periodo pa paga e proyecto aki ta 18 aña despues cu Green Corridor keda entrega.

E mandatario a splica cu den cuadro di e meta pa yega na un presupuesto balansa pa 2018, a traha concepto di presupuestonan cu ta inclui tur proyecto cu ta den pipe-line y cu ta den ehecucion caba. A inclui tur e proyectonan PPP. A haci un analisis di entradanan cu ta bay ricibi, kico ta e crecemento economico, etc. A base di esaki a pone tambe e suma di pago pa e proyectonan aki den e presupuestonan.

Oposicion ta papia di 700 y pico miyon na final, pero documentonan cu a presenta ta cu na final e proyecto ta bay costa menos cu 292 miyon, cual ta e suma cu a palabra cu Parlamento. E suma aki ta inclui den e presupuesto balansa.

Green Corridor, e mandatario a bisa, ta trece alabes un desaroyo economico cu ta proyecta den e Balanced Budget Agreement y kisas hopi mas door di inversionnan priva na momento cu e proyecto aki ta cla. El a sigura cu lo no surpasa e suma di 292 miyon.

Pa loke ta e speculacionnan di cobransa di tol riba Green Corridor, e mandatario a nenga esaki y a señala cu Aruba ta un isla demasiado chikito pa algo asina. Tol ta posibel na Merca of Europa. E ta posibel ora cu e caminda grandi ta hopi largo. Ademas si cobra, e hendenan ta bay desvia y pasa den otro barionan.

Expresionnan haci den e articulo aki no necesariamente ta refleha opinion di ArenaPoliti.co