Segun Parlamentario mr. Juan E. Thijsen e ta un realidad politico cu e siguiente eleccion e decision pa lidera nos pais ta un escogencia entre MEP y AVP. E por bira un gobierno mayoritario of un coalicion. E partido cu ta lidera e pais alavez lo determina tambe e rumbo di nos pais pa e anjanan venidero y den esey e desaroyo economico ta hunga un rol importante. Aruba como pais ta bibando un situacion na unda e comunidad tin hopi necesidadnan manera riba tereno di husticia, asuntonan social, educacion y salubridad publico pero e gobierno no tin suficiente plaka y ta pasa su tempo ta presta plaka y e tiki cu tin ta worde gasta den prioridadnan robez. Economicamente Aruba ta sobrevivi di turismo y danki na MEP tambe di refineria pero ambos hunto no ta suficiente pa nos economia carga nos pais. Gobierno di AVP no a haci solamente debe pa paga awor pero tambe debe pa worde paga e siguiente 30 anjanan.  Pues e necesidad pa diversifica ta urgente y akinan gobierno di AVP no a logra den 8 anja y no lo logra mas tampoco. Gobierno di AVP a gasta miyones den Al Gore, Green Conferences, Europe meets America, TNO sin produci un desaroyo concreto. Tur cos a keda na sonjonan di Mike Eman. Un otro bon ehemplo ta caya Betico Croes, Mike Eman a purba Michelle Hooiboer como Ministro pa Asuntonan Economico, despues a purba Mike de Meza, ora nan a faya Mike Eman a pone un experto Richard Arends y te ainda nada. Pio ainda awor Bureau Innovatie ta duna premio na esun cu bin cu e mihor idea ya cu ni Richard Arends no tin idea. Un otro aspecto ta e hecho cu partido AVP tin e tendencia ey cu nan ta goberna saliendo di interes partidista y di nan hendenan cerca.  Partido MEP segun Parlamentario mr. Juan E. Thijsen ta sali di punto di bista di e interes general ora di desaroya nos economia. Ora a habri Coastal no tabata tin compania di MEP envolvi manera awor De Meza y Paul Croes den Citgo cu ta strobando un desaroyo liber di e refineria. Segun Parlamentario mr. Juan E. Thijsen MEP ta kere den e refineria pero AVP y Hulanda ta haciendo cosnan cu no ta bon y ta stroba e proceso cana manera mester ta. Si algo bai malo MEP lo pone tanto gobierno di AVP como Hulanda responsabel. Parlamentario mr. Juan E. Thijsen ta consciente cu nos partner social lo tin un rol importante den e desaroyo di nos economia. Gobierno di AVP a enganja y silencia e sector priva. AVP a introduci leynan laboral cu a crash e mercado laboral. Partido MEP ta bai tin e tarea pa logra tur sectornan social economico ta mira den un direccion y lo percura pa introduci instrumentonan pa hunto traha eficazmente pa bin na un economia sano y fuerte y cu alavez ta trece progreso pa tur sectornan. Nos turismo mester un mehoracion ya cu e contribucion di turismo na nos producto nacional (GDP) a cai atras y algo mester ser haci. No por construi mas hotel y e mehoracion lo mester bin di e servicio cu ta ser duna den turismo. E mesun cantidad di turista mester bai gasta mas plaka na Aruba dor di dunele mas y mihor opcion. Nos refineria den man di AVP no ta bayendo bon y mesora MEP drenta gobierno lo mehora unda por tin obstaculonan. Pa loke ta toca nos zona economico den lama tin hopi cosnan secreto ta andando unda Hulanda tambe ta hunga un rol. Mike Eman no ta sirbi interes di pueblo y un gobierno di MEP sigur lo habri e pandera box di nos riquezanan y bin cu un maneho pa nos riquezanan ta na beneficio di nos economia y pueblo. Ariba tereno di Agricultura, Cria y Pesca MEP lo cambia e maneho di AVP di hobby pa uno unda Agricultura, Cria y Pesca lo bira tambe un pilar economico. Gobierno di MEP lo traha riba diferente mas pa logra mas pilar economico manera industria di cultura, comercio, economia di servicio y technico y conocimento huridica (arbitrahe). Pa loke ta trata desaroyonan economico cu ta bai a costo di nos naturalesa segun Parlamentario mr. Juan E. Thijsen MEP lo percura pa tin un mihor balance entre medio ambiente y desaroyo economico y di infrastructura. Den tur e desaroyonan aki e homber chiquito creativo tambe lo haya oportunidad pa desaroya negoshi atravez di prestamo via un banco di desaroyo y guia di negoshi. Resumiendo pues segun Parlamentario mr. Juan E. Thijsen MEP tin e vision pero tambe e capacidad y sinceridad pa logra mientras e otro alternativa AVP a mustra di no tin vision( hopi sonjo si ), ni tin capacidad (a cambia varios Ministro di Economia) y tambe AVP no ta sincero. AVP ta negocia scondi cu Hulanda y comercianten di AVP. Aruba merece mihor, hunto pa e cambio. MEP e unico alternativa.

Expresionnan haci den e articulo aki no necesariamente ta refleha opinion di ArenaPoliti.co