E partidonan MEP y PDR no kier para pa nan pais Aruba y declara publicamente cu e "KB" cu a duna Gobernador di Aruba pa no firma e presupuesto ta ilegal. Diabierna pasa MEP y PDR a demostra cu nan no ta para cu pais Sint Maarten tampoco contra di un "KB" cu ta viola autonomia di e isla ruman aki. MEP y PDR a demostra atrobe cu nan no tin principio. Nan no ta para pa Aruba contra ilegalidad y nan no ta para cu nos amigo Sint Maarten tampoco.

ASUNTO INTERNO
MEP y PDR ta usa e argumento cu nan no kier mete den asuntonan interno di otro pais. Remarcabel ta cu na juli nan a purba usa e argumento aki ora Aruba a uni cu Corsow y Sint Maarten contra e desicionnan ilegal di gobierno di Reino. Sint Maarten y Corsow a mustra e tempo ey cu nan no ta mete den asunto interno di Aruba tampoco. E tema di e "KB" contra Sint Maarten ta cu lo tin mucho corupcion den politica y gobernacion di e isla. Rene Herde': "Niun momento ta intencion pa nos bay mete den asuntonan interno di Sint Maarten y huzga si tin corupcion of no. Esey ta responsabilidad di Sint Maarten. Mescos nos tampoco kier y nunca a pidi niun otro pais pa mete den nos asuntonan interno di Aruba. Esey ta nos responsabilidad. Pero e discucion ta si nos ta para hunto contra desicionnan inconstitucional y unilateral di gobierno di Reino. Den e discucion si ta sostene Sint Maarten ta trata di e forma cu gobierno di Reino ta viola Statuut y autonomia di Sint Maarten pa dicidi ta ken ta bira minister di e pais ey. Mescos cu gobierno di Reino a viola Statuut y Reglamento di Orden di Gobernador di Aruba pa impone via un "KB" pa e no firma e presupuesto di Aruba. Den tur dos caso tin violacion di Statuut y e Reglamento di Orden di Gobernador. Ta contra di e desicionnan ilegal aki nos kier pa nos tur para hunto. Nos a haya sosten di Sint Maarten y Corsow na juli. Awor ta contra di e desicionnan ilegal na Sint Maarten cu nos ta sostene Sint Maarten. MEP y PDR a scohe pa para na banda pa motibonan oportunista. Keremi pueblo di Aruba y pueblonan di Corsow y Sint Maarten ta wak esaki y no lo lubida. Ora ta trata principionan, ora ta trata desicionnan dictatorial y ilegal, bo no ta core bay. Bo ta para hunto contra ilegalidad!"

Expresionnan haci den e articulo aki no necesariamente ta refleha opinion di ArenaPoliti.co