Den un mocion cu a wordo aproba unanimamente, Parlamento di Aruba a sostene e autonomia di e isla ruman Sint Maarten. E mocion cu a wordo adopta diabierna atardi ta referi explicitamente na e raport Biesheuvel cu a wordo traha door di e Comision Biesheuvel pa sali for di e discucion si gobierno di Reino por a stroba e nombramento di sr. Glenbert Croes como minister di gobierno di Aruba. E raport a bisa enfaticamente cu nombramento di ministernan no ta un asunto di Reino, pero un asunto di e paisnan autonomo di Aruba. Mescos cu e tempo ey AVP a sostene cu nombramento di minister ta un asunto autonomo di Aruba, awor AVP a enfatisa cu den caso di Sint Maarten tambe ta trata di un asunto autonomo di Sint Maarten cu gobierno di Reino no por mete aden. Awor aki gobierno di Reino a impone un "KB" riba gobernador di Sint Maarten pa e no firma e decretonan pa nombra ministernan, pero warda te ora e envestigacion cu gobierno di Reino lo haci, dun'e autorisacion pa firma. Esaki segun e analisis di e raport Biesheuvel no por, pasobra e no ta un competencia di gobierno di Reino. Mescos cu den caso di Glenbert Croes cu partido AVP a para pa autonomia di Aruba, awor AVP a para pa autonomia di Sint Maarten. Pasobra bou ley, loke ta conta pa nos, ta conta pa Sint Maarten tambe. Asina Rene Herde a declara.

E mocion cu parlamento di Aruba a adopta ta conta cu sosten di e diestres miembronan di e fraccion di AVP. E miembronan di MEP y PDR cu si tabata presente na comienso di e reunion e dia prome, a scohe pa no presenta pa e reunion diabierna merdia. Cu esey nan a duna di comoce cu MEP y PDR no ta para pa autonomia di nos pais manera poni den raport Biesheuvel. Pero  nan no ta para tampoco pa sostene Sint Maarten den mantene nan autonomia. Segun Rene Herde, diabierna tabata otro dia tristo den historia di nos pais y di Reino. Partidonan MEP y PDR a nenga di defende autonomia di nos pais y di un pais ruman. Pa MEP y PDR no ta e principio di igualdad y husticia segun ley ta conta. Pa nan ta loke ta cumbini nan ta loke nan ta scohe pe. Puro oportunismo politico partidista. Interes di pais y Reino no ta conta! Nan no ta para ni pa Aruba, ni pa nan paisnan ruman.

Wak e mocion cu a wordo aproba diabierna 7 di november 2014

Expresionnan haci den e articulo aki no necesariamente ta refleha opinion di ArenaPoliti.co