Agencia noticiero Bloomberg  Bussiness cu atencion pa ultimo desaroyo na refineria di Aruba.

NEW YORK - Agencia di noticia internacional Bloomberg a publica un boletin recientemente cu ta indica cu e compania estatal Venezolano, 'Petroleos de Venezuela SA' (PDVSA), ta buscando manera pa 'lease' refineria di Aruba. Proposito di e transaccion aki ta pa manda crudo pisa pa 'upgrade' den un crudo sintetico di mucho mas balor en bes di cu e refineria produci combustibel, manera gasolin.

CITGO Petroleum Corporation, subsidiario di PDVSA, ta den combersacionnan cu Gobierno di Aruba pa 'lease' e refineria. E compania estatal di petroleo cu sede na Caracas, ta studiando si por configura e refineria den un 'upgrader' pa procesa e crudo pisa di zona di Orinoco na Venezuela.

E plan ta wordo ehecuta mientras cu PDVSA, cu ta den problema di likides financiero, no tin recursonan pa construi 'upgraders' pa su petroleo. E ‘upgrader’ nan aki , cu ta necesario pa mehora e crudo Venezolano - cu parce asfalt - den un producto cu refinerianan por procesa. E ultimo 'upgraders' cu a drenta den funcion na Venezuela ta data di comienso di añanan 2000. E pais ta doño di 4 di e 'upgradernan' aki den cooperacion cu companianan manera Total SA y Chevron Corp.

"Den luz di e presion financiero creciente cu PDVSA ta enfrentando, esaki ta un alternativa obvio en bes di construi nan mesun capacidad di 'upgrading', cu ta hopi necesario," segun analista di BMI Research na New York. "Crudo di Venezuela no ta mercadiabel sin 'upgrade' of sin cu e wordo dilui prome. Cu PDVSA cada bes cu menos recurso pa paga pa su mesun diluyentenan, un tipo di 'lease' asina, menos costoso, por proba di ta un opcion mas viabel pa logra pone su productonan riba mercado."

E negociacionnan ta entre CITGO cu Gobierno di Aruba. Combersacionnan ta den fasenan final y e acuerdo di 'lease' ta wordo spera na final di maart proximo. E refineria na Aruba tin e capacidad di procesa 235,000 bari pa dia, segun informacion compila pa Bloomberg.

Expresionnan haci den e articulo aki no necesariamente ta refleha opinion di ArenaPoliti.co