ORANJESTAD – Durante ceremonia diabierna ultimo na porta di Refineria di Aruba, a hisa oficialmente e banderanan di e refineria y di CITGO Aruba. Na e occasion aki, CEO y Presidente di CITGO Petroleum Corporation, Nelson Martinez, a enfatisa e importancia di e relacion nobo cu a surgi entre e partidonan. “Trahando hunto nos ta crea un economia mas fuerte y un futuro mas briyante pa nos comunidadnan,” e ehecutivo a expresa.

Martinez tabatin hopi palabra di elogio pa Gobierno di Aruba, specialmente pa Minister Mike de Meza, encarga cu asuntonan energetico, kende den henter e proceso aki a demostra di ta un negociado grandi. “Bo por tin ideanan fuerte, pero pa concretisa esakinan bo mester tin lidernan fuerte. Pa 'mi Mike a mustra di ta un lider fuerte di e proyecto aki. Mi ta reconoce bo persistencia den e proyecto aki, cu ta trece beneficio pa ambos pais – Aruba, Venezuela.” Y a agrega cu di parti di Venezuela semper tabatin e interes, mirando e beneficionan comercial pa yega na un acuerdo.

El a repasa e historia di CITGO Petroleum Corporation, funda na 1910, prome cu el a papia di e nificacion di e acuerdo aki cu Aruba, cu ta a nifica un inversion significante y cu lo trece progreso significante pa Aruba tambe. E acuerdo aki, el a bisa, ta wordo guia pa principionan di solidaridad pa crea un entidad comercial dinamico cu lo provee balor socio-economico pa tur e partidonan envolvi.

E storia e cuminsa, cu combersacion riba e vision di CITGO y PDVSA pa maximaliza e balor di e crudo extra pisa di Venezuela procedente di e faha di Orinoco, e reserva di mas grandi na mundo. Cu esaki den mente, el a splica, a diseña un proyecto pa refineria di Aruba opera como un 'Upgrader' pa e crudo extra pisa aki, reforsando di e forma aki e cadena di “supply” di CITGO Petroleum Corporation. El a papia di e proceso di cuanto crudo nan ta procesa awo y kico kier logra cu refineria di Aruba. Na mesun momento a papia di otro proyectonan, manera e uzo di gas, no solamente den e refineria, pero pa baha e costonan di produccion di awa y coriente y suministro di gas na e poblacion. “Esaki no solamente ta baha e gastonan di energia, pero lo contribui tambe na e medio ambiente, reduciendo e emision substancialmente.”

E importancia di e acuerdo pa CITGO a keda expresa den e palabranan di Martinez ora cu el a bisa: “Nos ta hopi orguyoso di loke nos a logra aki awe cu inicio di e actividadnan di CITGO Aruba y di loke futuro ta trece no solamente pa CITGO Aruba, pero pa e comunidadnan local.”

Expresionnan haci den e articulo aki no necesariamente ta refleha opinion di ArenaPoliti.co