Produccion di Awa y Coriente cu gas por baha costo substancialmente. 

ORANJESTAD - Diabierna mainta a tuma luga un ceremonia di inauguracion di e refineria na San Nicolas, CITGO Aruba. Riba e mainta aki, a hisa banderanan di tanto CITGO Aruba cu ta operador di e refineria y Refineria di Aruba NV (RDA NV), cu ta un compania 100% Arubiano y doño di e refineria. Tambe tabata tin discursonan di director di RDA NV, ing. Alvin Koolman, Minister di Asuntonan Economico y tambe Energia, ing. Mike de Meza, CEO di CITGO Petroleum Corporation Inc., dr. Nelson Martinez, Minister di Labor drs. Paul Croes y Vice President di Petróleos de Venezuela S.A. Jesus Luongo cu alabes ta miembro di hunta di directiva di Citgo Petroleum Corporation Inc.

Na e ocasion aki a hisa e banderanan di Refineria di Aruba NV, como doño di e facilidad petrolero y tambe e bandera di CITGO Aruba, cu ta lease e refineria y opera esaki pa procesa crudo pisa for di faha di Orinoco. E reservanan di faha di Orinoco ta un di esunnan di mas grandi di mundo. E reservanan ta di por lo menos 290 mil miyon di bari di crudo pisa, cu refineria di Aruba ta diseña pa procesa.

Vice President Luongo a cuminsa su discurso gradiciendo Minister Mike de Meza, di kende el a splica cu "sin su perseverancia, esfuerso, disciplina y dedicacion nos lo no tabata aki." Tambe el a gradici e teamnan negociado di tanto Aruba como esun di CITGO Petroleum Corporation pa un bon trabou for di cua a sali un acuerdo sumamente beneficioso pa tur dos banda. Luongo a gradici Prome Minister Mike Eman y henter su gobierno pa un trabou cu el a cualifica como grandi y importante. Tambe a felicita parlamento di Aruba, representantenan di pueblo di Aruba, cu a ratifica e acuerdo cu teamnan negociado a logra entre e gobiernonan y CITGO Petroleum Corporation. Sr. Luongo a describi CITGO Petroleum Corporation como un di nan filialnan di mas importante di PdVSA, cu tin experiencia amplio den refinacion na Merca y cu ta conta cu tur sosten di PdVSA.

CITGO Petroleum Corporation ta distribui y mercadea un variedad grandi di productonan petrolero incluyendo gasolin y diesel y ta doño di 3 refineria, 48 terminal di productonan petrolero y ta doño of partner di 9 'pipeline' na Merca.

"Esaki ta un dia historico," Luongo a enfatisa, "nos tur ta para aki pa marca un momento historico cu ta reapertura di e refineria." Segun e vice-president di PdVSA, no ta unicamente e hecho cu e refineria ta habri bek ta loke ta importante. Loke ta mas importante ainda ta e solidaridad y complementalidad cu esaki ta trece cu ne. "Habri e refineria aki ta djis un prome paso," segun Luongo. E ta habri un cantidad di posibilidadnan importante pa por profundisa e relacionnan entre e dos paisnan bisiña.

El a referi na e proyecto di gas cu CEO di CITGO Petroleum Corporation, dr. Nelson Martinez, a menciona. "Ami lo tribi di bisa cu e proyecto di gas ta bay tin un impacto mas grandi cu esun di reapertura di e refineria." Esey sr. Luongo a sigui splica, ta hopi importante pa un pais manera Aruba cu tin un vision berde cu ta bay man den man cu su turismo. "Nos tur sa cu Aruba ta depende pa gran parti di su industria turistico."

Gas ta un parti importante di e acuerdo cu a logra cu apertura di CITGO Aruba. E refineria ta bay draai riba gas, haciendo e emisionnan mucho menos dañino pa medio ambiente. Pero e vice-president di PdVSA ta splica cu e mesun gas aki por uza pa genera awa y coriente cu por baha e costo di bida substancialmente. "Esey lo ta bay ta un beneficio directo pa pueblo di Aruba," segun Luongo, relacionando e proyecto di gas pa e refineria cu otro necesidadnan di nos isla.

Luongo a sigui splica cu na Venezuela a traha na desaroya gas pa transporte. "Na Venezuela nos tin 220 mil vehiculo cu ta a comberti pa uza gas y nan tin funcciona dual, nan ta traha cu gas y cu gasolin." E ehecutivo a splica cu tur esaki ta aplicabel tambe pa transporte publico y uzo di gas por ta algo hopi importante pa Aruba tambe den transporte general y publico.

E vice president di PdVSA a sigui splica cu tin posibilidadnan tambe pa por aplica e proyecto di gas pa Aruba su refineria pa casnan. Enbes di haci uzo di botter di gas convencional, esaki por bay directamente na cada cas. Tur esakinan ta posibilidadnan adicional cu e proyecto di un refineria cu ta opera riba gas tin pa poblacion di Aruba.

Venezuela tin e di 8 reserva di gas mas grandi na mundo cu por satisface e demanda interno di Venezuela y tambe por exporta. Aña pasa Venezuela a pone den produccion un campo di gas situa entre peninsula di Paraguana y e golf di Venezuela, cu ta produciendo mas di 510 miyon di pia cubico di gas pa dia y ta premira cu dentro di 3 aña e ta produciendo 1200 miyon di pia cubico pa dia. E pos di gas aki ta bay uza pa abastece demanda interno di Venezuela, pero tambe ta bay suministra refineria CITGO Aruba cu gas. 

Expresionnan haci den e articulo aki no necesariamente ta refleha opinion di ArenaPoliti.co