E raport di IMF ta papia cla den loke nos a logra den 5 aña y loke falta pa haci. Den e discucion cu a surgi opositornan a purba bisa cu IMF no a bisa nada nobo. Organisacionnan di doño di trabou y otronan ta accentua loke nan ta wak -for di nan perspectiva- como e prioridadnan pa sigui bay dilanti. Cu excepcion di oposicion den Parlamento (MEP/PDR) tin consenso cu bou di e maneho di gobierno di AVP nos pais a haci un progreso enorme, si wak unda Aruba tabata apenas cinco aña pasa. Corectamente ta indica cu 'ainda falta'. Esey tabata parti di nos propio lema pa eleccion.  Nos a mustra den eleccion kico nos a haci y kico falta. Pasobra nos mes, mas cu tur sa cu nos no a yega ainda unda nos kier pa nos pais y nos pueblo ta.

UNDA NOS TABATA NA 2009
Den forma cu no ta laga espacio pa duda IMF ta bisa cu Aruba a sali for di un "dobbel crisis" financiero y economico. Pero cu asina mes economia a crece te 4.5% na 2013 y lo crece cu 2.75% na 2015. IMF den palabranan masha cla ta mustra tambe con a logra sali for di e abismo economico cu nos tabata aden y corectamente ta bisa 'ainda falta'. Laga nos corda nos mes y tur hende, unda nos tabata, pa compronde e caminda cu nos a cana y kico falta pa cana.


CRECEMENTO ECONOMICO
Pone economia crece ta e forma di crea trabou y entrada pa famia, pa companianan y pa nos pais. For di 2004, bou di gobierno di MEP, e grafico (di CFT 2013) ta mustra cu economia di Aruba a cuminsa cay. Leu prome cu e crisis mundial y cierre di e refeneria! Ta e maneho di gobierno di MEP di stroba sector priva y bay guera cu tur inversionista, ta loke a cuminsa causa e caida economico di Aruba. Ora e crisis mundial a yega Aruba tabata tur debilita caba. E crisis mundial a manda economia te den bom di -13% den un aña. E didos sla duro cu IMF ta papia didje ta e cierre di e refeneria na 2012. For di tur esaki Aruba a recupera den tempo record di 5 aña bou di gabinete Mike Eman I.

CAIDA DI ENTRADA DI GOBIERNO
Un di e consecuencianan directo di e caida economico di 2009-2012 tabata e caida grandi den entrada di gobierno. Directamente y indirectamente gobierno a perde di haya mas cu 250 miyon florin pa aña! E. Grafico #2 di Banco Central ta confirma esaki! Cu menos entrada, mas hende sin trabou y entrada, fondonan di pensioen na caminda pa bancarota y nos pais den decadencia(=verloedering), gobierno di AVP mester a traha. Wak unda nos ta awe!



DESEMPLEO
Desempleo, e factor mas importante di economia a subi na 2009 te 11%. Mas cu un den cada dies cas di famia no tabata tin entrada. Mas cu 6000 trahado tabata sin trabou. Awe desempleo a baha te 6.8%. Y ainda falta. Pasobra pa nos e ta mucho halto ainda. Conclusion: MEP a bay laga nos pais den un abismo economico, desempleo halto, hopi menos entrada pa gobierno y un pais den deterioro. Wak unda nos ta awe.....y ainda falta!

Expresionnan haci den e articulo aki no necesariamente ta refleha opinion di ArenaPoliti.co