E programa Formacion Social (SVT) no ta solamente pa yuda hobennan dicidi si nan kier sigui nan scol of drenta e mercado laboral, pero e ta brinda nan un guia cu antes tabata existi na Aruba, unda un ciudadano ta percura pa otro. Esaki ta loke Prome Minister Mike Eman a recorda e hobennan di Grupo 6 di Formacion Social durante un bishita den Parke Arikok.

E mandatario a recorda su propio bida tempo e tabata chikito, ora cu el a perde su tata cu cinco aña y pueblo di Aruba a percura p'e, su mama y rumannan. "Mi ta corda cu si un mucha keda sin bay scol, e docente ta yama puntra si e studiante ta na cas, cu si e mama no ta na cas, e bisiña ta tira bista ..."

Por medio di proyectonan di Formacion Social of eventonan cu ta promove comunitarismo, Prome Minister Mike Eman y su Gabinete kier trece bek e sentido di preocupacion social bou di e comunidad.

E mainta tempran aki prome cu e grupo a cana den Parke compaña pa varios Parkranger e mandatario a splica e hobennan pakico Formacion Social, cu casi 100 hoben ya caba a haya chens pa participa den dje, ta asina importante. No solamente, el a bisa nan, e ta un forma pa treknan riba e bon caminda, tira bista riba nan durante un periodo, pero yuda nan via diferente tipo di lesnan pa yega na e decision di kico nan kier haci cu nan bida: Sigui cu nan estudio of drenta e proceso laboral. Pa esaki "mi ta hopi gradici na Parke Arikok cu ta brinda e hobennan aki e chens pa core stage", e mandatario a bisa e director recien nombra Emil ter Horst. El a haci un apelacion na e director pa evalua e chens di por tuma mas di e hobennan aki, sea pa core stage of drenta servicio di Parke.

E hobennan di SVT ta haya diferente tipo di training, ademas di esun militar y di condicion. Jessie Ras, coordinador di e Programa di Formacion Social, a splica cu nan ta wordo prepara riba diferente tereno pa por drenta e mercado labora, inclusive den sector hotelero, unda ta y lo bay tin hopi cupo nobo ta habri. "Mi ta masha gradecido na hotelnan cu ta cooperando cu e programa aki, unda cu no solamente ta permiti e hobennan core stage, pero tambe ta tuma nan den servicio si tin espacio," Ras a duna di conoce e mainta aki.

Ter Horst, director di Parke Arikok kende tin apenas dos dia trahando, a expresa di ta haya e programa aki uno bunita, principalmente e intencion su tras y a priminti cu lo bay haci un evaluacion con nan lo por bay duna un cooperacion mas amplio den nan trabou pa promove durabilidad den e maneho general.

Expresionnan haci den e articulo aki no necesariamente ta refleha opinion di ArenaPoliti.co