E siman tras di lomba tabata uno sumamente importante ora cu asuntonan importante pa Aruba y mundo a keda discuti den ‘Green Aruba - Where Europe Meets the Americas’. Prome Minister Mike Eman, durante un conferencia di prensa dialuna mainta a trece dilanti cu resultado di e conferencia aki a demostra cu Aruba tin apoyo for di dos continente grandi - Hulanda (Europa) y Merca (America) - den e maneho cu ta hibando pa logra yega ta totalmente independiente di energia produci di forma convencional.

Un di e puntonan importante den e conferencia aki tabata e discurso di e representante di Gobierno di Presidente Barack Obama, esta Francisco Palmieri di Departamento di Estado, kende a expresa un reconocemento pa vision di Aruba riba tereno di energia limpi. Prome Minister Eman no a sconde su satisfaccion ora di scucha e funcionario halto di Gobierno Mericano bisa cu nan kier uza Aruba como modelo. "Despues di Hulanda, awor Merca ta dunando cooperacion na Aruba," Eman a bisa.

Palmieri ta e prome funcionario asina halto di un Gobierno di Merca cu a bishita Aruba den hopi aña. Anteriormente tabatin un otro bishita halto, pero no den funcion mas, esta ex-Vice Presidente Al Gore di e gobernacion di Bill Clinton, kende tabata un keynote speaker den e prome Green Aruba.

E Mandatario, den e conferencia di prensa dialuna mainta, a expresa cu cada biaha Aruba ta ampliando mas su base di loke kier logra pa futuro. Pesey tabata un orguyo pa e mandatario pa por comparti cu tur esnan cu a bishita Aruba pa e conferencia aki, tur e ideanan nobo cu tabatin. Pero tambe e hecho cu p.e. aña pasa tabatin groundbreaking di e parke di panel solar na aeropuerto, y e aña'ki e prome fase a keda imaugura. Igualmente ta conta pa MOU firma pa realisa e proyecto di "Waste to energy" y awo un aña despues, e participantenan tabata testigo di inauguracion di e planta."E forma aki di actua y traha, poniendo e vision den practica, ta haci cu Aruba su vision ta wordo admira pa motibo di ta traduci nan den hechos. Como Prome Minister di Pais Aruba orguyoso so mi por ta di presenta e exitonan aki di nos comunidad, tin biaha den cual nos propio companianan di utilidad ta hunga un rol y tin biaha sector priva. Pero tur ta capitalisando  nan mes riba e vision y ta sinti nan mes entusiasma pa forma parti di e vision aki."

Expresionnan haci den e articulo aki no necesariamente ta refleha opinion di ArenaPoliti.co