Inspira pa e maneho di Gobiernonan di Prome Minister Mike Ema, EPB Santa Cruz a cuminsa cu e bunita proyecto di Greenhouse, cual ta wordo maneha pa e propio studiantenan. Awor a yega asina leu, cu ta cuminsa construccion un di dos Greenhouse na e scol situa na Sta. Cruz.

Un cantidad di docente, studiante, Prome Minister Mike Eman y boluntarionan di Team BoBario diasabra a bini hunto pa traha riba e di dos Greenhouse aki por bira un realidad. Tur diasabra Prome Minister Mike Eman y un grupo di boluntario ta haci trabou boluntario den comunidad, promoviendo comunitarismo y e biaha aki a duna un man na EPB Santa Cruz.

Un di e docentenan presente tabata Jennifer Bermudez, docente di Comercio y Rekenen na EPB Santa Cruz. El a splica cu e proyecto aki a wordo incorpora den e programa di Aruba Bank “Good for your Neighbourhood” pero e edicion pa scolnan mes. E instituto bancario a busca scolnan participa cu un proyecto pa nan mesun scol via cual ta encurasha e hobennan pa bini cu algo pa mehora nan scol y promove “Team Building”. Nan ta sponsor e scol cu un suma di placa cu mester wordo uza pa ehecuta e proyecto den menos cu un luna di tempo. E ganado di e programa lo wordo anuncia riba diabierna 7 di november awor.

Segun Juffrouw Bermudez, a dicidi riba un proyecto berde, ya cu e ta beneficia e mesun scol. “Tur e productonan cu nos ta produci, ta yuda e studiantenan den e lesnan di cushinamento, practicando y preparando e hobennan pa un trabou pa futuro.”

Prome Minister Mike Eman a tende di e proyecto aki y como cu e ta algo cu su Gobierno ta promoviendo no solamente a duna acto di presencia, pero a duna un man tambe. Pesey tambe Juffrouw Bermudez a duna un mandatario un regalo, un t-shirt di e competencia aki. El a splica cu e programa di Aruba Bank ta encera cu mester invita pueblo pa yuda den e proyecto. “Nos por bisa cu nos muchanan a haci gran parti di e trabou pero boluntarionan semper ta bon-bini na nos scol. Nos kier a gradici Prome Minister pa a presenta pa yuda nos e mainta aki.”

E mandatario mes ta recorda e bishita anterior na EPB Santa Cruz unda cu el a keda hopi impresiona tanto e lesnan cu ta wordo duna den diferente area, usando hopi biaha material recicla, como e dedicacion grandi na cushina. “E arte di cushina den combinacion cu nan mesun jardin, cu materialnan cu nan mes ta produci. Pesey ora cu e Aruba Bank a bini cu e programa, e hobennan di EPB Sta. Cruz a scoge pa amplia nan “community garden” pa nan aumenta nan produccion di fruta y berdura. No solamente pa siña e hobennan mas di agricultura sino tambe con ta conecta esaki cu uzo di e productonan fresco den nan cushina.” E mandatario ta haya cu e ta un oportunidad unico pa e hobennan t’asina cerca di e produccion, uzando tecnologia di hydroponics cu ta bon den e clima seco cu Aruba conoce. “Uzando tiki awa pa logra hopi cosecha di berdura y fruta.”

Resaltante ta cu den e combersacion cu e mandatario a hiba cu algun di e hobennan, nan ta hiba e practicanan pa nan cas tambe. Asina, segun Prome Minister Eman, por a scucha cu varios di nan ta produci comcommer, tomati y berdura na cas. Esaki por tuma luga, ya cu na scol nan ta haya e parti teoretico tambe di con pa atende cu e diferente tipo di matanan. “Nos kier felicita e scol pa e forma aki di duna les cu ta hopi practico pero tambe promoviendo e trabou di boluntario y comunitarismo pa desaroyo un proyecto. EPB ta demostrando tur dia di ta adaptando cu e cantidad di practica cu ta wordo duna cu ta preparando su studiandantenan pa bira sostenibel.”

E maneho di e scol aki ta crea hopi speransa pa Aruba, cu mester importa cantidad grandi di tanto berdura como fruta for di exterior, unda tin mas yobida. Sinembargo a constata cu un gran parti ta bini for di Falcon, Venezuela, cu no tin un clima mucho diferente cu Aruba. “Esey a demostra cu nan por planta y produci, y ta haci cu nos ta mira e oportunidad cu nos tambe por planta. Minister Oduber ta haciendo un tremendo trabou pa trece plantacionnan bek na Aruba. Y cu Santa Rosa ta hibe tambe na scolnan, ta completa e vision di sostenibilidad cu Gobierno tin.” Prome Minister Eman a recorda cu sostenibilidad no ta solamente riba e area di energia cu lo yega cu no mester importa crudo pa e produccion di coriente y awa, pero sostenibilidad ta tambe cu bo por percura pa bo propio alimentonan. E ultimo evento di Green ‘S Cool a concentra hopi riba e tema di propio produccion. 

Expresionnan haci den e articulo aki no necesariamente ta refleha opinion di ArenaPoliti.co