E idea pa mas hotel na Aruba bira "all inclusive" ta keda un discucion hopi preocupante pa Aruba. Sigur awor cu turismo ta forma e base principal di nos economia. E preocupacion principal pa hotel y resorts cu ta opera como "all-inclusive" ta, cu e turista ta haya tur cos pa un prijs den e hotel mes. Resto di companianan, taxistanan, restaurantnan, tiendanan etc. pafor di e hotel no ta beneficia mucho di e turista. Pa e motibo aki e fraccion di AVP a presenta y adopta un mocion den parlamento luna pasa pa pidi e minister di turismo pa traha ley y reglanan nobo pa desencurasha hotelnan pa wordo opera como "all inclusive". Tambe a pidi pa introduci legislacion pa crea un sistema di exigencia pa por opera un hotel den forma di "all inclusive". E pensamento di AVP ta cu tur hende y tur sector di Aruba mester tin beneficio di turismo. Directamente of indirectamente.

REUNION DI PARLAMENTO
E fraccion di AVP tambe a yama un reunion di e Comision fiho di Turismo di Parlamento pa dialuna awor cu e minister di turismo sr. Otmar Oduber. Den e reunion ey e fraccion kier tende di minister den ki forma e ta pensa di regula e trend di "all inclusive". A compronde cu ta intencion di e minister pa presenta dialuna caba e concepto di e cambionan di ley cu e ta pensa di propone na Parlamento. Mirando e desaroyonan cu ta bay basta lihe, ta intencion di trata e cambionan di ley aki a corto plazo. E peticion ta pa haci esaki den e simannan cu ta bin, ya cu e importancia y urgencia di e tema ta exigi esey. Dialuna awor, 1'or di merdia, e reunion cu Comision fiho di Parlamento lo tuma lugar.

Den combersacion cu e lider di e fraccion di AVP sr. Rene Herde', ela splica cu e importancia grandi di e tema aki ta cu e trend di "all inclusive" por tin efectonan indesea tambe pa nos economia. Rene Herde': "Ta pa e motibo aki nos ta duna esaki asina hopi atencion y prioridad. Nos a y ta sigui haci hopi esfuerso pa desaroya nos turismo den uno diversifica y cu ta atrae turistanan cu ta gasta hopi den henter nos pais. Den restaurantnan, den recreasion cu tin rond di nos isla, nos kier pa turistanan pasa tempo den e diferente areanan di nos isla y haci uzo di tur e facilidadnan cu tin. Nos kier pa nan uza nos taxinan y cumpra den nos tiendanan. Asina nos tur ta beneficia di turismo. E trend di "all inclusive" ta bay contra di e meta aki. Pesey mester control'e pa e no controla nos turismo." Dialuna awor lo sigui e reunion y duna mas informacion na nos comunidad.  

Expresionnan haci den e articulo aki no necesariamente ta refleha opinion di ArenaPoliti.co