E ta habri oportunidad pa renoba maneho pa financiamento di enseñansa

"E veredicto di corte cu e directiva di scol catolico SKOA no por djis hisa e placa cu mayornan tin cu paga pa scol di nan jui, ta masha masha importante. Specialmente pasobra huez ta bisa cu no por hisa gastonan pa asuntonan cu no ta cay bou di e curiculo di e scol. Y mas importante ta cu e 'schoolgeld' aki no ta obligatorio, pasobra no por ta asina cu mester paga mas pa un mucha na un scol catolico compara cu un mucha na un scol publico. Of cu un mucha ta wordo nenga un luga na un scol pasobr su majornan no por paga e costo adicional. Mester warda pa wak kico huez lo dicidi den e caso completo (= bodemprocedure) mes. E veredicto di awe tabata den un caso sumario. Pero e veredicto aki ya ta duna un indicacion con importante corte ta haya e derecho y trato igual den enseñansa. Diferencia den gastonan di enseñansa sigur ta crea diferencia y bareranan inacceptabel pa bay un scol. Ami ta masha contento cu e veredicto den e caso sumario aki." Asina Rene Herde' di partido AVP a declara awemerdia despues di a tende di e veredicto di corte cu un grupo di major a entama. Prome cu e caso aki gobierno tambe a bay corte contra di e desicion di SKOA pa hisa e "placa di scol". Rene Herde': "Esey no ta trañami. Ta trata di un asunto sumamente importante, esta e derecho igual di cada mucha pa haya enseñansa. No por tin niun barera pa niun mucha haya e enseñansa cu e kier, den e scol cu e kier. Pa ley enseñansa ta un derecho di cada mucha y gobierno pa ley mester paga tur scol e mes un suma pa cada mucha. Scolnan por cobra majornan un suma adicional pa asuntonan cu no ta cay bou di e programa (= curiculo) di scol. Pero esaki no ta nifica cu un mucha por wordo nenga pa bay e scol pa motibo cu su majornan no por paga e placa adicional. Esey ta wordo considera un barera inhusto of violacion di su derecho. Pesey mi contento cu huez ta tuma e derecho igual pa enseñansa asina importante den su desicion."

MANEHO & FINANCIAMENTO
Segun Rene Herde' mester warda e veredicto final den e caso completo (= bodemprocedure), paso ta den e veredicto di e caso ey huez lo bisa hopi mas con e ta interpreta ley. Pero e indicacion di e caso sumario aki ya ta duna motibo pa pensa cu awor ta e momento pa fiha bon cla kico ta den e curiculo pa cua pueblo via gobierno ta paga p'e. Un forma mas pa yega na e curriculo nacional. Pa e otro gastonan pa actividadnan y servicionan cu un scol kier duna, e por cobra. Pero esey no por ta obligatorio segun corte. Pa e motibonan aki Herde' ta kere cu e ta habri oportunidad pa renoba e maneho riba financiamento di enseñansa. Awor aki gobierno ta paga casi tur gasto di tur scol na Aruba, manera e edificio y su mantencion, material di scol, salario di maestronan di scol, nan pensioen y gastonan medico. Pero gobierno no tin mucho di bisa den e scolnan priva. Asina mes cu gobierno ta paga pa tur mucha e mes un suma na tur scol, muchanan ta wordo nenga un luga na scol, pasobra nan no ta paga e placa adicional. Rene Herde': "E tipo di veredicto aki ta habri oportunidad pa renoba maneho di enseñansa. E ta un bon interpretacion di e derecho igual pa haya enseñansa y e autoridad di directivanan di scol. Pero tambe e ta un alivio directo pa majornan."

Expresionnan haci den e articulo aki no necesariamente ta refleha opinion di ArenaPoliti.co