Awendia e consumidor local ta wordo atraca den dia cla sin cu nada ta wordo hasi. Bandi di e hecho cu e ta wordo abusa y castiga cu medida afectando su poder di compra diario e tin cu confronta su mes cu e hecho cu e no tin proteccion. Netamente esaki ta e situacion actual caminda cu tur producto di alimento ta conociendo aumentonan drastico!

E ehempel di mas recien ta e caha di webo cual a conoce un aumento drastico bayendo te cu 6.50 y tin cierto casonan te 7.50! Ta importante pa remarca cu esaki ta cai bou di un alimento basico y ta un fuente di proteina cu diaramente ta wordo usa den tur hogar. Den e ley anticua cu Aruba tin esaki no ta cai den e canasta basico. E conclusion ta cu nunca e no a wordo bon regla y  adapta. Den un rapport cu nos a lesa relaciona cu prijzenverordening ta para lo siguiente : " Daarnaast worden de verkoopprijzen van het lokaal geproduceerde witte brood, verse kippeneieren en vis eveneens via deze verordening gereguleerd." Dus e maneho ta papia di prijs maximo solamente pa loke ta wordo produci localmente. Aruba no tin chicken farm na gran escala y logicamente pa e motibo ey mester importa. Door cu ta trata di un fuente di proteina cu hopi persona ta come kizas mester a considera pa no hasi distingshon entre webonan produci local of internacional. Den principio mester a considera pa ahusta esaki y amplia e canasta basico den su totalidad door cu e no ta duna refleho di actualidad.

Na Aruba e canasta basico ta consisti di solamente 11 producto cu a wordo escogi sin un base real. Pa colmo pa añanan largo e no a wordo adapta pa por ta riba mesun liña cu necesidadnan basico actual ni tampoco tin control. De facto e ta nifica cu tur loke awendia ta cay of wordo considera como uso basico no tin un prijs maximo haciendo e dificil pa e famia keda mantene poder di compra mientras aumento di prijs ta sigui tuma lugar door di comerciantenan. Pues bo por conclui cu e ciudadano no tin proteccion pa por logra cumpra loke ta basico. Pa e motibo aki e ampliacion ta hopi importante pasobra asina so e famia por logra yega tur luna na su necesidadnan basico pa evita abuso di aumento di prijs ora por ehempel hisa e BBO/BAZV  manera ta e caso aworaki of ora bin cu otro medidanan. Ta di lamenta cu Gabinete Eman cu tanto a papia di cuida poder di compra ta e mesun cu ta bira afecta esaki cu su medidanan! Cada biaha cu mas cobransa y of mas belasting wordo imponi riba e pueblo e florin di cuidadano ta perde su balor y loke ta mas tristo placa no ta yega pa cubri e necesidadnan basico di un hogar. 

Expresionnan haci den e articulo aki no necesariamente ta refleha opinion di ArenaPoliti.co