E actual Minister President di Aruba no tin Integridad y tampoco Solidarismo como Gobernante. Na 2009 Sr. Mike Eman ta kibra baricada y welga contra e Gobierno e tempo ey pasobra e tawata contra di BBO 3%. E la hiba un campaña cu e lo ELIMINA esaki si e wordo eligi na 2009. Despues di 5 aña den Gobernación ata Sr. Eman ta AUMENTA e mesun BBO 3.5% cu e y su partido AVP a demonisa. Dicon na 2007 a tawata malo y awe na 2015 e ta bon??? Kier traha Hotel di All-inclusive na Seroe Colorado pero na Palm Beach e ta malo.

Gabinete Mike Eman II ta pretende cu Aruba ta den un estado progresivo cu prosperidad pa su pueblo. Un ilusión cu ta leeuw di e realidad di nos pais. Hasta cierto medio comprometi a cuminsa cuestiona Mike y su Gobierno cu ta hibando nos pais cada dia mas den perdición. Tin atraco y ladronicia rond di nos pais un situación hamas bisto den Gobiernonan di MEP di 2001-2009. Formamento di Gang y droga na gran escala combina cu un maneho Neoliberal promoviendo alcohol y fiesta. 

Den e proceso Aruba ta den su momentonan mas peor. Un KB, Autonomia Financiero na peliger; Mester ractifica e ley aki e luna di Augustus. Sr. EMAN atrobe ta faya e pueblo mirando cu na 2009 e la bisa cu Hulanda no lo intervini na Aruba al contrario Aruba su Status Aparte ta na peliger. A priminti cu lo inverti mas placa den Enseñansa entre otro lo ELIMINA Boekenfonds. Al contrario tur cos a SUBI incluyendo Schoolgeld den diferente nivel di enseñansa. Mas di 500 mucha sin school y tambe klas mas grandi cu lo afecta enseñansa.

Mike Eman a prefera pa aumenta e debe nacional di Aruba: Na 2010 56.1%, Na 2011 61.4%. Na 2012 67.6%. Na 2013 73.9%. Na 2014 81.2%. Na 2015 81.7% y Pronóstico pa 2016 ta 83.4%. Cualkier hende lo pensa cu tur e proyectonan di PPP manera Hospital, Green Corridor, RingWeg, Mudamento di Waf, MFA's y hopi mas lo ta den e debe aki. Pero no mi digno pueblo e proyectonan menciona di PPP ta bin riba e debe astronómico aki un total di 2.4 Biyon florin cu interés.

Solidarismo ta keda ausente den e fiestamento cu fondonan publico. Cuanto mucha den dificultad pasobra mayornan ta cay den pobresa y Gobierno ta yuda na un manera hopi marginal. Si ta bay gasta 46 Miyon florin na Coordinador y varios otro aventura cu no a beneficia Buchi y Maria anto e Gobierno aki ta nada mas cu uno Facista. Tin contract grandi pa cierto medionan comprometi sin destaho publico pero no tin placa pa Cuido Medico, Serlimar, Deporte, Enseñansa, Vivienda, Subsidio pa Mary Jane Foundation, Casa Cuna y varios mas, Seguridad y Empleó. Aruba y su pueblo no por mas cu un maneho asina malisimo. E districto di San Nicolaas ta un santana cu un tasa di desempleo haltisimo. Ta yega ora pa exigí Mike y su Gobierno pa entrega nan retiró pasobra niun hende no por tapa e mal maneho aki pa nan. 

Expresionnan haci den e articulo aki no necesariamente ta refleha opinion di ArenaPoliti.co