E echo cu nos tin suficiente luga na scol y e obligacion pa ley pa tur mucha bai scol, no ta suficiente pa sigura cu tur mucha ta caba scol tambe. E cantidad di alumno cu ta presta bou di nan nivel y e cantidad di studiante cu no ta caba scol ta mucho grandi. E consecuencia ta cu tin hopi hoben cu por mas y miho awor. Si nan no persisti of haya ayudo, pa resto di nan bida nan ta keda traha y biba bou di nan nivel. Mescos tin hopi hoben cu no ta caba nan scol pa tur sorto di motibo, Cu un tiki mas esfuerso y un otro organisacion na scol, nan lo caba nan scol y haya miho trabou y entrada pa nan mes y nan famia. Esey ta parsemi e meta di nos enseñansa!

RETENCION
E meta final di tur nos enseñansa pesey mester keda cu tur mucha y hoben ta bay scol y niun ta sali di scol sin un diploma of un ofishi cu ta cuadra cu nan interes y capacidad. Cu otro palabra: nos hobennan no mester djis bai scol. Nos mester percura y haci tur cos posibel pa nan cab'e tambe. Sin duda e motivacion y esfuerso continuo di e alumno/studiante ta e factor mas importante. E ayudo y sosten di majornan ta crusial den esaki. Pero e organisacion di scol na otro banda tambe ta un fuente di obstaculo pa logra e meta cu tur hoben ta caba nan scol. Cosnan cu ta haci'e dificil pa hobennan caba nan scol ta por ehempel e echo cu scolnan no ta laga un studiante ripiti un materia (vak) mas cu dos of tres biaha. Un regla innecesario. No tin niun motibo pa no duna un alumno cu faya e ayudo specifico cu e mester y lagu'e ripiti e materia cu e falta pa pasa pa otro aña of caba su scol. No tin motibo pa limita e cantidad di biaha pa haci esaki tampoco. Tin scol cu ta nenga un studiante pa bolbe scol si e yega un cierto edad of ta nenga entrada si e no tin un edad specifico. Tin hoben cu door di e reglanan aki no por keda scol ni drenta otro scol. Tin scol cu ta exigi un studiante pa haci henter un aña di scol pasobra ela faya un materia so. Tin scol cu ta exigi un studiante pa warda seis luna of mas pa haci un tentamen pa e por haya su diploma. Hobennan no ta warda. Nan tambe tin cu sigui cu nan bida. Tin scol cu ta nenga un studiante pa drenta scol bek pasobra ela keda sinta mas cu un biaha. Tur esakinan ta obstaculonan cu ta stroba un studiante pa caba su scol cu un diploma y sigui su carera of haya un trabou na su nivel. Sin e diploma e studiante tin cu presta y traha bou di su nivel y haya menos salario. Cu un tiki cambio den organisacion scolnan lo yuda hopi studiante pa caba nan scol apesar di a keda sinta, di nan edad of cualkier otro motibo.

RETENCION di studiantenan mester ta un meta cu scolnan secundario mester traha na realisa. E ta nifica cu mester haci mas pa tene e studiante den scol te ora e caba su scol cu e diploma. E cantidad di studiante cu caba scol cu un diploma no ta e unico meta of norma pa midi exito. E cantidad di alumno y studiante cu keda sinta of sali di scol sin un diploma ta mes of mas importante. Pasobra e ta nifica cu e scol pa haci tur lo posibel pa tur studiante. Hasta cambia nan forma di organisa les y examen. Fraccion di AVP ta bay pidi mas atencion den maneho di gobierno pa hisa e retencion di studiantenan independiente di nan edad.

Expresionnan haci den e articulo aki no necesariamente ta refleha opinion di ArenaPoliti.co