Na mes momento ta recorda mayornan pa haci uzo di e ayudo financiero cu gobierno ta brinda  

ORANJESTAD - Scol ta habri y esaki ta trece cu ne gastonan mas halto cu normal pa famianan. Mester uniform, tas di scol, sapato y asina por sigui. Na Aruba tin varios mayor cu tin problema pa por cubri e gastonan aki. Sigur si nan tin mas cu un yiu ta bayendo scol, esaki por bira un fuente di dolor di cabes y stress. Ya pa algun aña caba gobierno a introduci e asina yama schoolkinderentoeslag di Afl.200,00 pa mucha pa luna pa famia riba bijstand. A aumenta e bijstand cu 25% pa asina esnan cu ta cobra e suma aki tin un poco mas espacio. “E schoolkinderentoeslag y aumento di bijstand ta un ayudo consistente pa yuda esnan di menos recurso”, Prome Minister Eman a bisa durante un conferencia di prensa.

Eman a splica cu banda di e ayudo aki tin un otro ayudo structural cu ta Afl.120,00 pa paña y articulo pa scol pa e muchanan den un cas unda ta cobra bijstand y Afl.120,00 pa cada mucha pa yuda paga schoolgeld. Pa por haya e ayudo aki mester acudi na departamento di Asuntonan Social y eynan haci e tramitenan necesario hunto cu e pruebanan cu ta rekeri pa yega na remarke. E aña escolar ta den porta y mayoria mayor a cana e caminda aki caba. Esaki ta un recordatorio pa esnan cu no a haci esaki ainda y cu tin derecho riba e ayudo aki. “Sociale Zaken t’ey pa yuda cada famia na Aruba cu mester di ayudo. Esaki pa percura pa cada mucha tin loke e mester pa por atende scol,” Eman a bisa.

“Banda di e ayudo di gobierno tin hopi clubnan social na Aruba cu ta masha activo pa duna un man den e periodo aki. Nos ta agradecido na nan cu hopi solidaridad ta extende un man na famianan cu ta para dilanti e retonan cu un aña escolar nobo ta trece cu ne”. Eman a splica tambe cu banda di e ayudo financiero aki pa famianan den bijstand, tin un contribucion cu ta cana via e departamento di Enseñansa pa yuda famianan cu tin un entrada un poco mas cu bijstand pero cu no ta surpasa 37 mil pa aña. “Pa e famianan aki cu tin yiu cu ta bay Colegio Arubano cu tin gastonan adicional tin un asistencia financiero di Afl.550,00 pa cada yiu. Esaki ta pa yuda cubri gastonan di buki y rekenmachine. Riba e website di Directie Onderwijs e rekisitonan necesario pa haya e suma di placa aki ta wordo describi. Esaki ta cay bou categoria di subsidio y cualkier famia cu no a haci uzo di esaki por busca informacion riba e website.”

Prome Minister Eman ta desea tur hoben cu ta cuminsa un aña escolar nobo hopi forsa, exito y dedicacion. “Nos mester di nos hobennan pa nan triunfa y sobresali den nan educacion pa asina realisa nan ambicion, nan ideal y nan soñonan. Tambe pa mañan nan haci nan mayornan orguyoso di nan logronan y pa nan por garantisa di e forma aki un carera briyante.”

Expresionnan haci den e articulo aki no necesariamente ta refleha opinion di ArenaPoliti.co