ORANJESTAD – Apesar di e solo fuerte y calor di e ultimo dianan, un cantidad grandi persona a sa di probecha di e ofertanan y ambiente cu tabatin den Caya Grandi riba diabierna y diasabra ultimo. E ‘Back To School Bazaar’ ta un actividad organisa dor di Gobierno di Aruba hunto cu Business Improvement District (BID) pa incentiva actividad comercial den centro di ciudad. Ademas di prijsnan atractivo obtenibel te den oranan di anochi, tambe publico por a disfruta di diferente actividad manera beach tennis, Dino Jump pa mucha y DJ’nan di Electric Festival riba Plasa Daniel Leo.

Hopi di e comerciantenan den Caya Grandi a pone mesa y tentnan pafo pa ofrece mercancia selecta na prijsnan special. Asina por a haya keds di marca, jeans y tambe tasnan na super bon prijs. Jazmin Bustillos Dubero di Sport Caribe a tuma nota di hendenan buscando pa haci e ultimo compranan prome cu aña escolar nobo cuminsa.

E ta di acuerdo cu e continuacion di tipo di evento manera e bazaar paso ta trece circulacion di hende den caya. “Mi ta kere cu mas evento asina ta hopi bon pa e comerciante y tambe pa e cumprado.” E comentarionan cu el a ricibi di parti di clientenan tambe ta positivo. “Nan ta hopi ta hopi contento cu e actividad aki.”

Turistanan tambe a disfruta

Den combersacion nan a expresa cu e ambiente den caya ta uno masha agradabel cu e actividad y musica. Nan a sa di probecha di e bon prijsnan cu tabatin riba e mesanan pafo di e tiendanan. Tambe a pone enfasis riba e sensacion di siguridad y trankilidad den caya. Dos di e tramnan tabata den circulacion continuo, semper yen. Na e diferente stopnan tabatin hopi hende wardando pa wordo transporta pa otro parti di caya of pa bay bek caminda nan a parkeer nan auto.

Leidy Perez Sanchez a bay den Caya Grandi cu su tres yiunan pa cumpra cos pa scol, pero tambe a wak’e como un oportunidad pa e muchanan distrae. Apesar di e calor, e tabata satisfecho con e compras ta bayendo. “Den weekend no tin nada di haci y bo por bin cu e muchanan y keiro un poco.” Nan a sa di disfruta di e entrenimento pa mucha cu tabatin riba Plaza Nikki Habibe y “a bay varios biaha riba e Dino Jump”. El a conta con nan a cana e caya di punta pa punta.

Entre un tienda y otro, publico tabata tuma pausa pa refresca y come algo den un di e diferente café y restaurantnan den Caya Grandi. Riba Plaza Daniel Leo a reina un ambiente di fiesta cu presentacion di DJ’nan local den cuadro di e Electric Festival cu ta tuma luga na comienso di September. E torneo di beach tennis a tuma luga riba e parkeerplaats pariba di ex-Bon Bini Bazaar y a goza di hopi participante.

Gabinete Mike Eman II ta contento di por ofrece na pueblo di Aruba un Caya Principal cu ta sumamente bunita, limpi y sigur pa por haci compras y simplemente disfruta di un esfera agradabel. Tipo di actividad manera e Bazaar ta bay ripiti pa sigui incentiva no solamente compras den centro di ciudad, pero tambe entretenimento y recreacion den henter e area, incluyendo espacionan publico y museo.

Expresionnan haci den e articulo aki no necesariamente ta refleha opinion di ArenaPoliti.co