E ta prefera di entrega su responsabilidad pa otro dicidi pa nos Pais. 

Gabinete Eman a hiba un mal maneho financiero cu a pone cu nos Pais a conoce cifranan di deficit y di debe nunca antes bisto. E debe di nos Pais a acomula den 23 aña a redobla den solamente 4 aña di tempo. Esaki ta pone un precion grandi riba nos finanzas publico caminda cu gastonan di interes ta tuma un parti grandi di nos fondo publico y ta pone cu no ta resta espacio financiero suficiente pa inversionnan necesario den enseñansa, seguridad y salubridad. E deroche di fondo publico a bay completamente for di man te cu a pone cu companiannan di rating ta downgrade nos Pais indicando cu nos Pais ta core risico grandi di no por paga bek nos debenan. E mal maneho financiero aki a brinda Hulanda a base di nos Statuut e chens pa interveni na nos Pais den forma di supervicion financiero di CFT. Y como cu Gabinete Eman a mustra di no tin e boluntad pa stop di derocha e placa di Pueblo y tampoco tin e boluntad pa drecha e desaster cu nan a haci, a pone cu awor nan ta bay entrega e autoridad di e Pueblo aki pa dicidi riba nos propio cartera, nos autonomia financiero, bek den man di Hulanda. Cu e entrega aki, Gabinete Eman lidera pa Minister Mike Eman ta tira afor e lucha di e Pueblo aki pa por dicidi pa nos mes y ta baas den nos mesun cas. Si Gabinete Eman a goberna drechi, y anda na un manera responsabel cu e confiansa cu Pueblo a deposita den nan, no tabata tin mester a entrega ningun autoridad na Hulanda. Pero ta bisto cu Minister Eman no tin e boluntad pa conserva ni defende e honor y dignidad di e Pais aki, pero ta prefera sigi actua manera un gobernante iresponsabel entregando su responsabilidad den man di Hulanda pa nan drecha e situacion sin worry cu e Pueblo lo wordo perhudica malamente na man di medida.


27 augustus 2015

Expresionnan haci den e articulo aki no necesariamente ta refleha opinion di ArenaPoliti.co