Pabien na tur maestro riba dia International di Maestro. Solo ta Sali pa Tur Maestro tambe.  

Enfoke ta riba habilidad
Pa decadas largo, educacion tawata ensera, educa e generacionnan nobo tocante locual nan nos mes a haci den pasado, pa nan por eherce esey awe y den futuro. Pero desde ciglo 21, cu technologia a cambia nos bida diario immensamente, e generacionnan presente mester wordo educa pa un futuro cu ni nos mes por imagina ainda. E enfoke den enseñansa a bay di conocemento pa habilidad. Como Gobierno bo tarea ta pa ensera cu bo educadornan por cumpli cu e necesidadnan di futuro generacionnan.

Sobrevivir of Sobre sali?
Lamentablemente na Aruba, nos ta wak nos educadornan traha masha duro, cu masha tiki material. Implementacion di e technologia cu ta disponibel awendia, no ta ni yega riba e nivel minimo na Aruba pa por bisa cu bo educacion ta prepara bo futuro generacionnan na un manera adecua pa nan por sobre sali. E ta keda na un nivel cu di baina nan por sobrevivir.

Cumpli cu responsabilidad!
Nos maestronan, den mi opinion, tin e tarea mas importante cu tin pa cu e hobennan den nos communidad... Pa logra esaki nan no tin ni e minimo na material manera sufficiente buki, un curiculo general of e training necessario pa por upgrade nan mes como educador di ciglo 21. Nos muchanan ta core nan 'marathon di educacion' riba un caretera cu ta full kibra. Esnan cu ta encarga cu e tarea noble y di suma importancia pa sostene y facilita nos educadornan, no ta cumpli cu nan responsabilidad.

Mal maneho den enseñansa. Locual esnan cu ta bin cu e maneho no ta realisa, ta cu ora e fayonan den nos educacion ta toca bo propio yiu, e criatura cu abo a inverti tur bo amor, conocemento, speransa den dje, cu ora e bira e victima di e mal maneho cu tin awor den enseñansa na Aruba, cu esey lo afecta no solamente e bida di bo yiu, pero di su yiunan tambe.

Futuro generacionnan.
Laga nos tur ta consiente riba e Dia Internacional di Maestro, cu no ta riba e dia aki so, nos tin cu mustra nos aprecio y sosten, pero tambe na e momentonam clave, caminda cada un di nos por haci un diferencia den nos communidad cu e derecho sagrado cu nos a haya pa por vota. Nos lo mester bay bek den pasado pa wak cua lesnan nos a siña di e erornan cometi y di e exitonan cu a wordo logra, pa asina tuma decisionnan correcto pa futuro generacionnan. Ta pesey, riba dia Internacional di Maestro, mi kier sigui apoya tur maestro y bisa nan pa no perde speranza: Solo ta Sali pa Nos Maestronan tambe!

Expresionnan haci den e articulo aki no necesariamente ta refleha opinion di ArenaPoliti.co