Pa mas cu un siglo caba nos sistema di enseñansa no ta cumpli cu e necesidadnan di pueblo di Aruba. Algo straño, si bo realisa cu si a logra un desaroyo grandi den otro areanan na Aruba. Pero tambe, si bo calcula cu problemanan mas complica manera traha raket cu ta yega te na luna, si por a wordo logra mas cu 50 aña pasa caba, con por ta cu bon educacion, adapta specificamente na e necesidadnan di nos muchanan no a wordo logra ainda? Nos kier wak mas Arubiano, manera Mr. Edward Cheung, cu a bay den espacio. Pasobra esey ta nifica cu tur cos ta posibel pa nos Arubianonan. Pues en general por bisa cu e conocemento pa un mihor educacion tey caba na mundo y lo por a yega na Aruba for di masha tempo caba. Pakico toch nos ta wak enseñansa bay atras na un manera drastico aki na Aruba, desde cu Mike Eman su Gabinetenan I y II a sinta? 

Bon Enseñansa ta mas dificil cu 'rocket science'
Probablemente si, ora bo tin un Gobierno cu a ricibi mas cu un reconocemento pa su mal gobernacion den e forma di KB y CAFT. Pero en realidad e ta posibel y factibel pa mehora educacion na Aruba pa uno mas amplio y halto pa pueblo di Aruba. Locual ta pasa na Aruba den e ultimo 6 añanan ta, cu structuralmente ta sigui perhudica e mayoria di pueblo, gruponan y na e mesun momento tambe ta privilegia otro grupitonan. Asina ta sigui crea hopi obstaculo pa cierto gruponan den nos comunidad. E ta un marathon di educacion cu un 'valse start', riba un caretera kibra. Mike Eman su Gobierno ta keda pone prioridadnan robes. Por ehempel, e ley cu Michelle Hooijboer kier forsa riba e scolnan di MAVO. Ningun research a wordo haci na Aruba pa por bisa cu esey ta e mihor decision. Falta di placa pa Mike Eman sigui fiesta, ta e unico motibo pa corta den e presupuesto di enseñansa. 

Exigencianan absurdo. 
Nos ta wak esaki claramente den e maneho di Gabinete Mike Eman, caminda a endeuda nos pais na un manera iresponsabel pa na e mesun momento enrikece cierto hende na y pafo di Aruba. Ademas a baha e presupuesto pa enseñansa asina hopi, cu e cantidad di muchanan cu por drenta educacion di un nivel halto (HAVO) despues di 6e klas a wordo reduci cu 50% y esnan cu por drenta di MAVO tambe. E tipo di test a cambia di psychologische test pa un test di conocemento di e idioma Hulandes, hasta den matematica. Ademas e exigencianan pa por cualifica pa haci e test pa Colegio a subi na un nivel absurdo, caminda un mucha mester logra minimo un averahe di 8,5 pa cierto vaknan den 6e klas. 

Cuida e soñonan di nos yiunan.
Mescos ta conta pa e exigencianan pa por sigui educacion na e nivel di HAVO despues di MAVO. A pone hopi enfoke pa esnan cu a gradua sigui cu un estudio na EPI enbes di HAVO, pero Minister Hooyboer Winklaar no ta publica ningun jaarverslag cu e porcentahenan di studiantenan cu a gradua. E no ta publica cu e cantidad di studiantenan cu ta logra pasa door di e prome 2 añanan di EPI lo por a baha na un nivel di menos cu 40% (depende di e sector). Na e momento ey, e alumnonan aki no ta conta como drop out mas, pasobra ya nan a pasa e edad di 18 aña y nan tin e diploma di MAVO. Asina ta bolbe perhudica nos yiunan, pa logra nan soñonan. Pasobra cu solamente un MAVO diploma awendia, bo no por haya un trabou facil. Minister di Enseñansa ta percura pa cera contractnan lucrativo di seguro cu ta beneficia su famia. Ta pesey, nos como maestro, mayor y pueblo en general tin e obligacion pa percura pa futuro generacionnan tin e mihor oportunidad pa desaroya nan mes. Ta pesey nos lo mester haci bon uzo di nos derecho pa vota. Cada voto ta conta. Un herencia di nos antecesornan cu nos mester cuida pa e futuro generacionnan tambe keda liber. Nos mester exigi di politiconan, cu educacion ta keda un prioridad na Aruba y pa nan brinda e mesun oportunidad na un y tur. Asina so, Solo ta Sali pa nos Tur!

Expresionnan haci den e articulo aki no necesariamente ta refleha opinion di ArenaPoliti.co