Cambia ley pa esnan cu tin cu paga nan fiansa di estudio bek 

Fraccion di MEP algun luna atras a anuncia un cambio di ley cu nan ta trahando riba dje. A referi aki na nan programa di campaña, den cual ta menciona cu mester brinda alivio na esnan cu caba di studia y mester paga nan fiansa di estudio bek.
"Varios persona a puntra con ta para cu esaki, y mi mester bisa cu e ta un trayectoria largo y difícil, pa asina traha un ley bon hinca den otro. Nos ta trahando riba e cambio di ley, cu ta haci e pagonan di fiansa di estudio deducibel (aftrekbaar) di belasting, te na un maximo di 10 mil florin pa aña, pa 10 aña. Corsou a caba di introduci esaki fin di aña pasa, pues no por tin obhecion di ningun hende pa haci'e na Aruba tambe.
E areglo aki lo bay conta pa tur esnan cu ta paga un fiansa di estudio bek, pues no solamente esnan cu ta paga e fiansa di Hulanda, pero tambe di gobierno di Aruba of otro institucion cu ta duna fiansa di estudio.
E ta bai conta pa esnan cu termina nan estudio awor, pero tambe pa esnan cu a termina nan estudio caba y ta pagando caba.
Nos ta den e fase final di consulta cu expertonan pa algun detaye di e ley, prome cu nos entreg’e oficialmente na Parlamento.
Den pasado tabata tin intentonan pa duna un alivio den forma di e pago di interes, sinembargo nunca e intentonan ey a concretisa, y ademas nos proposicion ta bay mas leu. Mescos cu na Corsou, nos kier pa full e suma cu ta wordo paga, wordo deduci di belasting, no solamente interes.
E areglo aki lo costa gobierno berdad poco entrada di belasting, pero di otro banda, e lo atrae nos profesionalnan pa bolbe Aruba bek y asina contribui na desaroyo di nos economia, y di e forma aki e placa di belasting ta drenta bek.
Maske den Parlamento tin hopi polarisacion y manera cu MEP bin cu un proposicion, AVP ta tir’e den bari sushi, toch mi no ta kere cu por tin un politico cu por ta contra di esaki, y mi ta conta cu nos lo haya sosten amplio di tur partido den Parlamento y den Gobierno pa logra pasa e ley aki mas pronto cu ta posibel", Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co