Manera ya a bira custumber, e aña aki tambe partido MEP bou liderasgo di sra. Evelyn Wever-Croes a tene un campaña pa yuda cu yenamento di formulario di belasting, sumamente exitoso. Den total a yuda mas di 500 persona, yenando mas di 700 formulario, y trahando varios otro tipo di carta.
Esnan cu a acudi na Cede di MEP a wordo atendi pa un equipo di 11 voluntario, tur experto riba e tereno di belasting. Nan por a combersa cu Lider di MEP y e candidatonan cu tabata tey presente. Un danki di curason ta bay na tur cu a duna nan aporte pa e campaña aki ta exitoso un biaha mas.
Parlamentarionan di Curacao cu tabata na Aruba pa un reunion, tambe a probecha di acudi na Cede pa mira con e campaña ta wordo organisa, y nan a hiba e concepto Curacao pa aya tambe bay ehecut’e.
E ultimo dia pa entrega bo formulario ta diamars awor, 1 di december. Si ainda bo no a yena bo formulario, ta bon pa bo pidi extension "uitstel" no mas tarda cu diamars awor 1 di december.
Esnan cu NO yena nan formulario y NO pidi extension, ta bay paga dimas belasting. Pa cuminsa bo ta haya un multa, y riba dje e Inspector mes por calcula bo entrada pa bo y usualmente nan ta calcula esaki mucho mas halto di locual cu e ta. Finalmente tin e chens tambe cu nan ta entrega keho na Ministerio Publico of haci un investigacion penal si bo no entrega bo formulario. Tur esaki ta motibo di sobra pa bo yena bo formulario na tempo.
Paga belasting ta deber di nos tur, pero no paga dimas belasting!

Expresionnan haci den e articulo aki no necesariamente ta refleha opinion di ArenaPoliti.co