Timonstraat na Madiki a yega na beurt 

ORANJESTAD – Proyecto Luz den Bario ta continua su cobertura nacional durante 2016. Diaranson mainta a toca turno na Timonstraat pa haya cambio di luz convencional pa e sistema di luz LED. Den e fase aki di e proyecto, ELMAR a busca 12 mil unidad pa cambia esnan existente, pero tambe pone nobo caminda no tabatin prome. Prome Minister Mike Eman y Minister Benny Sevinger a pasa personalmente pa mira con e instalacion ta bay y tambe combersa cu bisiñanan. E ultimonan aki tabata masha contento cu Gobierno a cumpli cu su promesa y awo ta sinti mas sigur y agradabel den e area pafo di nan cas despues cu solo baha.

“E luz ta yuda hopi hopi mes. Anochi bo por sinta dilanti porta y disfruta di loke nos gobierno ta haciendo,” asina Olinda Perez, un habitante a duna di conoce agregando cu “actualmente muchanan por core atardi y bo ta sinta admira con e muchanan tin caminda pa nan core sin stof.” E area aki a conoce desde 2014 un cambio total den su infrastructura cu a inclui acera y caminda nobo cu espacio pa parkeo y camindanan di un solo via brindando un trafico mas sigur pa e habitantenan. Tambe e cayanan a haya mata pa crea un miho y bunita ambiente.

Ministerio di Infrastructura tin bou di su responsabilidad e departamento di DTI cu ta hunga un papel importante den instalacionnan nobo. Minister Sevinger a expresa cu e cambio di luznan por mustra manera algo simpel, pero mester tene na cuenta e diferencia grandi cu ta haci den bida di esnan cu ta biba den e bario. “E ta un proyecto cu Gobierno ta mira den diferente aspecto. Un aspecto ta e siguridad den e barionan caminda mas luz bo tin, mas siguridad bo tin; dos ta cu ta baha nos consumo di coriente como pais; y tres ta cu nos ta bay den tecnologianan berde cu ta miho pa nos medio ambiente.”

Esaki ta e metanan cu Gabinete Mike Eman I y II a pone su dilanti pa loke ta maneho di luz publico. Asina ta cumpli cu un di e deseonan di mas grandi di pueblo, dus pa trece siguridad den barionan. Tur esaki ta posibel sin cu e ta nifica un gasto adicional pa caha di gobierno. Manera Premier Eman a splica, a haci calculacion di e energia cu ta spaar cu cambio di 9 mil di e luznan convencional pa LED. E reduccion di consumo ta bay pa tres punto nobo di luz den barionan cu no tin iluminacion.

“Pa motibo di e eficiencia ey cu nos ta introduci, nos por bay yuda mas bario sin gasto adicional pa nos pueblo. E ta e miho uso di tecnologia cu tin awor. LED ta bay contribui grandemente na e iluminacion no solamente unda cu no tabatin y ta bay haya, pero tambe esnan cu ta bay reemplasa , e claridad ta bay subi,” asina Minister President Eman a bisa. “Manera por a scucha di e ciudadanano presente aki, nan ta hopi contento cu e trabou cu gobierno ta haci.”

Otro ehempel ta Belen de Jesus Lugo, un habitante di Timonstraat pa mas di 50 aña. “Nos ta hopi contento pasobra nan a traha caminda nobo, pone mata y tur cosnan ey,” el a bisa splicando cu, como hende grandi cu e ta, anochi no ta wak bon y mester sali pafo cu un flashlight. “Super contento nos ta paso esey tabata mi deseo. Danki pa e peticion y bo a cumpli cu ne,” el a bisa Minister.

Expresionnan haci den e articulo aki no necesariamente ta refleha opinion di ArenaPoliti.co