Programa ‘Luz den Bario’ ta bay mas leu cu cambio pa sistema mas sostenibel 

ORANJESTAD – E proyecto a cuminsa cu hopi velocidad na 2012 y a cambia hopi luz durante e ultimo cuater aña. Despues cu e siguiente cargamento di luz a yega, instalacion ta sigui y asina por spera hopi bario cuminsa haya cambio di luznan convencional, pero mas importante ainda, puntonan nobo di luz den cayanan. Asina Minister President Mike Eman a splica diaranson mainta mientras e tabata presencia instalacion di luz LED na Timonstraat na Madiki. Pa e mandatario, e programa ‘Luz den Bario’ ta bay hopi mas leu cu djis e cambio pa un tecnologia mas avansa y eficiente; e ta mas interesa den e efecto positivo cu esaki tin pa e ciudadanonan di nos isla.

E carga mas reciente di luznan LED cu ELMAR N.V. a ricibi ta di 12 mil unidad di luz. Durante e proximo lunanan, personal di e compania di electricidad ta bay instala nan na diferente punto rond Aruba. Tecnico Jimmy Luidens a splica cu e proceso pa cambianan ta igual cu esun normal. E diferencia ta den e sistema di luz, paso prome tabata uza un di presion halto y awo ta uza Smart LED cu tin un software cu bo por comunica cu ne. “E luz nobo ta duna mas claridad, e ta mas miho den tur sentido y ta uza menos coriente. Bisiñanan ta comenta cu e diferencia ta grandi. E ta un cambio di dia pa anochi, hopi mas cla y un diferencia den tur sentido.”

Minister President Eman tambe ta hopi contento pasobra ora e ta cana den barionan rond di nos isla, un di e peticionnan grandi ta pa por haya luz, particularmente den e barionan caminda no tin suficiente iluminacion publico. Ta importante pa diferente motibo, manera siguridad paso ora tin claridad tur hende ta sinti nan mes sigur; pa muchanan cu ta hunga den bario, cu ta keda un poco mas laat pafo ora solo baha, bo ta wak cu e ta haci e bario mas completo cu tur e trabounan cu Gobierno ta haciendo di renobacion.

Adicionalmente, Premier Eman ta splica “E sentido di un bario bon cuida, un bario cu ta duna un calidad di bida na nos conciudadanonan manera nan merece ta wordo engrandece. Esey ta e meta di gobierno pa asina nos conciudadanonan haya e atencion cu Gobierno tin e obligacion pa duna nan y di otro banda ta stimula e ciudadanonan den e barionan pa nan por ta mas envolvi y tuma un rol den dirigi e rumbo cu nan kier pa nan bario bay.”

Esey ta haci tambe cu e bishita cada diahuebs den bario caminda hunto cu BoBario ta inventarisa ken ta interesa pa tuma un rol den nan bario y mira unda e talentonan ta; si ta den algo deportivo of den educacion, cu por duna cierto cursonan den bario. “Tin biaha e por ta cu un bario tin basta hende grandi cu ainda nos kier of no mester bay den un cas di cuido pa nos grandinan, pero si mester di asistencia, poco atencion, yuda pa busca nan remedi, pasa wak un rato con nan ta. E sentido di convivencia y solidaridad ey nos kier inculca y gobierno ta hunga rol importante den haci un apelacion riba nos ciudadania pa sinti e responsabilidad civico aki,” asina Minister President ta bisa.

“Bo ta crea un sentido cerca e ciudadano cu gobierno ta haciendo su parti y e ta sinti mas stimula pa e tambe bay hunga un rol mas activo den su bario. Awe E bario di Madiki por ta di hubilo,” asina e mandatario a finalisa bisando, gradiciendo tambe na ELMAR N.V., Minister de Meza cu via di su ministerio ta percura pa Elmar haya e fondonan pa busca e luznan aki, Minister Sevinger cu ta encarga cu DTI pa controla e instalacionnan aki.

Expresionnan haci den e articulo aki no necesariamente ta refleha opinion di ArenaPoliti.co