Durante un conferencia di prensa na Arashi dialuna mainta, Minister Otmar Oduber a duna di conoce cu introduccion di e maneho nobo yama Beach Policy, tur e operadornan di actividadnan acuatico y tambe hotelnan tin te cu fin di april 2016 pa re-aplica pa nan permiso tanto na DIP como tambe na Directie Scheepvaart (DSA). E mandatario a tuma e oportunidad pa aclaria tambe cu intencion di e prome permiso aki ta pa un duracion di 6 luna. A scoge pa haci e prome permiso di un duracion 6 luna pa asina por inicia den un forma structura e maneho y coordinacion entre tur e departamentonan envolvi manera ta DIP, DSA y Cuerpo Policial. Ta hopi importante pa hiba un maneho structura pa locual ta trata e comportacion tambe riba nos beachnan. Den pasado hopi biaha Cuerpo Policial a haya su mes ta atende y traha rapportnan riba companianan di watersports, hotelnan y tambe esunnan cu ta opera riba nos beachnan. Situacionnan menos agradabel cu den cierto caso te hasta boet mester a parti pero no tabata yega na coordina cu ni DIP of DSA tampoco. Na momento cu implementa e maneho nobo di Beach Policy entrante prome di juli 2016, lo tin un colaboracion entre e departamentonan. Un colaboracion pa cumpli cu e maneho nobo di Beach Policy cu a keda aproba den Conseho di Minister. Na momento cu constata un situacion, cu duna un boet, of mester traha un rapport pa un actividad contra ley, den e mesun maneho di “3 strike, out!” pa Cuerpo Policial, esaki lo conta pa DSA y pa DIP. Cu otro palabra asina un persona haya su mes confronta cu husticia 3 biaha, of no a cumpli cu e reglanan di e maneho nobo di Beach Policy, esaki ta conduci na hala e permiso bek aden. Ta duna un periodo di 6 luna pa tur envolvi adapta na e sistema di regulacion nobo aki. Entrante januari 2017 e permiso lo ta vigente pa 1 aña y como tal no mester registra cada 6 luna.

Minister Oduber  ta indica cu actualmente DSA tambe tin un sistema di registracion y inspeccion di botonan ta tuma luga cada 6 luna, y awor ta conoce un cambio den cual e registracion y inspeccion ta cana man den man cu e permiso cu ta wordo otorga pa operacion riba nos beachnan cu ta vigente pa un aña. Pues anualmente ora mester renoba e permiso ta haci e inspeccion y registracion di botonan tambe, aliviando e preocupacion di e operadornan riba beach cu no mester haci esaki cada 6 luna mas.

Expresionnan haci den e articulo aki no necesariamente ta refleha opinion di ArenaPoliti.co