Dialuna mainta Minister Otmar Oduber durante su rueda di prensa na Arashi a aclaria cierto incertidumbre cu por a nota entre e operadornan di actividadnan acuatico, cu actualmente ta operando riba nos beachnan. Despues di a splica un poco riba e periodo cu e prome permiso ta vigente e mandatario a sigui elabora riba e di dos periodo cu tin un duracion mas largo y ta pa un aña. Entrante prome di januari 2017 anualmente na momento cu mester renoba e permiso ta haci e parti di inspeccion y registracion di botonan. Pero no ta asina cu durante un aña lo no tin control riba esakinan.

E mandatario ta duna di conoce cu pareu cu  implementacion e di e Beach Policy ta introduci un maneho nobo unda  lo por spera mas bishitanan di control inespera durante e aña. Esaki ta pa percura cu e operador ta maneha cu ekiponan adecuado y sigur pa tur e usuarionan cu den mayoria biaha ta trata di nos bishitantenan.

Sr. Oduber ta indica cu siguridad di e personal di e operadornan pero tambe di nan usuarionan ta na prome luga. No ta un secreto cu tin companianan operadornan di actividadnan acuatico ta presta ekipo di otro pa pasa e inspeccionnan na DSA. Minister ta sigui bisa cu den e practica aki e operador no ta engaña e departamento di Directie Scheepvaart, pero por trece su mesun empleadonan y clientenan na peliger. Esaki ta un di e motibonan cu a introduci e sistema nobo unda DSA hunto cu DIP y/of cu Cuerpo Policial lo por conduci inspeccionnan inespera durante aña pa controla y vigila cu tur cos ta na ordo. Pa e mandatario ta importante cu e introduccion di Beach Policy wordo mira como un flexibilisacion pero cu control estricto di e actividadnan cu ta tuma luga riba nos beachnan caminda tanto e usuario pero sigur esunnan cu ta opera riba nos beachnan, sa cu tin reglanan cu mester tene na cuenta cu nan y ta reglanan cu ta traha na nan bentaha mirando cu na momento cu cumpli cu e maneho ta laga e usuarionan sinti hopi mas sigur y na nan satisfaccion, unda e operador por funciona tambe hopi mas trankil. 

Expresionnan haci den e articulo aki no necesariamente ta refleha opinion di ArenaPoliti.co