Dialuna awor Parlamento lo trata e ley tocante CITGO y e reapertura di Aruba su refineria.
Pa e comunidad di San Nicolas sigur esaki ta un noticia sumamente gratificante. E ta algo pa celebra pasobra e ta trese un speransa nobo, no solamente pa e pueblo di San Nicolas, pero pa Aruba completo.
Nos ta consciente cu apertura di CITGO lo nifica un crecemento economico pa nos pais y esey ta algo sumamente positivo. E reapertura di nos refineria lo trece entradanan adicional den caha di Gobierno, cu e speransa cu finalmente lo por inverti den proyectonan cu realmente tin prioridad pa nos comunidad.

No solamente nos mester celebra e reapertura di e refineria, pero nos mester ta consciente cu tur cuminsamento tin su retonan y preocupacionan tambe.
Un di e retonan di mas importante cu tin aworaki pa cu e apertura di CITGO, ta e situacion laboral di e trahadornan cu ainda ta traha cu Valero Refining Company-Aruba N.V.

E empleadonan cu ainda ta cay bou di e maneho di Valero Refining Company-Aruba N.V, a keda notifica algun dia atras cu CITGO lo tuma e refineria over, pero cu nan maneho no por para responsabel di e derechonan y beneficionan cu e empleadonan lo por tin cu Valero Refining Company-Aruba N.V. Pa ta mas specifico, e contesta cu e empleadonan a haya for di Valero Refining Company-Aruba N.V, ta cu CITGO ta esun responsabel pa duna contesta riba nan preguntanan.

E preocupacion di e grupo di trahador aki ta totalmente valido y sumamente importante, teniendo na cuenta cu tin di nan cu ta den servicio pa mas cu 20 aña caba. Esaki ta nifica cu, segun nos leynan laboral, e trahadornan actual di Valero Refining Company-Aruba N.V tin derecho pa haya compensacion pa tur e añanan cu nan ta den servicio di e compania aki.
Tin trahadornan cu ta den edad halto caba y a cuminsa preocupa pa nan derecho di pensioen.
Mirando e inseguridad cu e trahadornan local di Valero Refining Company-Aruba N.V ta pasando aden aworaki pa cu nan beneficionan laboral, e ta mi deber pa trece nan preocupacionnan dilanti durante e reunion publico dialuna awor caminda lo bay trata e ley di CITGO.

Ora bo tin un bedrijfsovername, e compania cu tume over tin e deber di tuma tur e añanan di servicio y beneficionan cu e trahadornan a acumula cu e compania anterior. Den e caso aki, pais Aruba ta esun cu lo tuma over e compania en cuestion, dus ta Gobierno mester bin dilanti awor y duna e grupo di trahador aki e garantianan cu nan ta pidiendo. T’e na e momentonan aki Gobierno ta den silencio y no ta dunando cara na e trahadornan preocupa di Valero Refining Company-Aruba N.V, cu ta wardando pa clarificacion si ta Gobierno of CITGO lo responsabilisa cu nan beneficionan laboral.

E preocupacionan di e grupo di trahadornan di Valero Refining Company-Aruba N.V lo ta un di e puntonan primordial riba agenda di nos fraccion, durante e reunion publico na Parlamento cu lo trata e ley di CITGO. Nos ta spera cu Gobierno lo por duna claridad riba e asunto aki y no hunga politica rond di dje manera ta nan custumber.

Expresionnan haci den e articulo aki no necesariamente ta refleha opinion di ArenaPoliti.co