Tabata 7 anja pasa cu pueblo a duna Mike Eman e liderasgo di nos pais. Mike Eman a scohe pa un desaroyo sostenibel como vision pero su hechonan ta demonstra lo contrario! Envez di crea un Aruba dushi pa biba aden Mike Eman a destrui e hogar cu jama Aruba! Mike Eman a crea desempleo. Mike Eman a stanca nos economia. Mike Eman a trece instabilidad! Mike Eman a trece intranquilidad! Mike Eman a trece insiguridad! Y sigur e no a trece felicidad pa nos digno pueblo! Nos naturalesa a worde destrui, nos medio ambiente danja, nos comercio destrui, nos poder di compra danja. Mike Eman ta bai den historia pa haci prioridadnan robez. Mike Eman a escohe pa traha riba cosnan material cu ta enganja e wowo di hende cu cosnan bunita. Mike Eman ta pone hendenan kere den un prosperidad falso. Awor den su ultimo anja ta core cabez di gai pa purba ganja e pueblo un biaha mas. Di repente tur cos ta posibel. Despues di 7 anja pa sorpresa awor si Mike Eman tin solucion pa e problema di dump, Caya Betico Croes tin solucion, di repente si tin espacio pa aumenta entrada un tiki, choller na scolnan ta haya atencion y cuidao djies nan tin solucion pa e ruina di Bushiri, prome cu elecion di biaha si por baha prijs di awa y coriente. Segun Parlamentario mr. Juan Ady Thijsen atrobe Mike Eman ta den su racha di ganja e pueblo su wowo. Ta keda na pueblo pa realisa cu di berdad Mike Eman a destrui e hogar Aruba y cu Mike Eman mes no por ta esun cu tin cu drechele. Mester di un team di hendenan capacita, sincero y responsable pa bin atende cu probleman di nos pais y re-establece e hogar cu a bai perdi. Mirando e ultimo desaroyonan politico ta partido MEP ta e unico alternativa segun Parlamentario mr. Juan Ady Thijsen. MEP semper ta lucha pa e progreso di nos digno pueblo!

Expresionnan haci den e articulo aki no necesariamente ta refleha opinion di ArenaPoliti.co