Na 2009 nos pueblo a duna Sr. Eman y su partido AVP e honor di guia nos pais. Segun Sr. Eman e lo percura pa un Aruba di 5 strea: Barionan di cinco strea, scolnan, hotelnan, cuido medico di cinco strea y awe despues  di 7 aña y pico nos ta leu di esaki. Nos pais a bay cu pasonan gigantesco atras y lo dura te 2040 pa por yega bek na kisas unda nos di Movimiento Electoral di Pueblo a lag’e na 2009.

Nos contrincantenan politico ta bisa cu awo por wak unda nos placa ta bay. Un set di bendepatria sabiendo cu despues di 2017 nos ta na 105% debe di nos Gross Domestic Product. Pues ainda nos falta 5 cen pa cubri tur e debenan ASTRONOMICO di Michel Godfried Eman y su gobierno burdugo. Na 2009 nos di Movimiento Electoral di Pueblo a laga esaki na 41.5% den margen di normanan Europeo (Statuut di Reino Hulandes) y un deficit aceptabel y cu 970 Miyon Florin extra pa Sr. Eman den caha di pais Aruba.

Awe na 2016 nos ta un pais completamente den desorden: Corupcion den Inmigracion, Douane, Waf, Dimas, fronteranan habri unda ilegalnan, droga y arma ta drenta na cantidad. Ta parce cu nos a bira colonia di paisnan narcotraficante. Criminalidad cu atraco, Ladronicia, Joyriding y un Economia stanca. Unda e plan Aruba di Sr. Eman a keda? Unda e "Ainda Falta" a keda? Mike Eman y AVP a bira un berguensa nacional. Casi tur compania estatal ta den rood, casi tur departamento di gobierno coriendo den peliger cu e maneho Neoliberal di Sr. Eman y su compinchinan. Hasta Serlimar ta na peliger.

Directiva di Movimiento Electoral di Pueblo a atende un Congreso di COPPPAL na Boneiro y nos lo bay te Nacionnan Uni pa recobra e Autonomia cu Gabinete Eman I y II a entrega contra boluntad di nos pueblo. Nos ta rechasa recolonizacion di nos pais. Nos di Movimiento Electoral di Pueblo no ta haci wega cu nos derecho di Autodeterminacion manera Sr. Eman cu su welga di Ensure na 2014. Si Sr. Eman a goberna bon su gobierno no lo ta bao curatela y supervision financiero. Tur indicador ta mustra cu nos pueblo a wordo masacra riba tur tereno. Tin 46.000 automoblista cu no por paga nan plachi number di auto. Pues tin suficiente prueba pa manda e gobierno Manipulador, Burdugo y Ladron cas pa semper. 

Expresionnan haci den e articulo aki no necesariamente ta refleha opinion di ArenaPoliti.co