BAN UNI Y HASI NOS HENDENAN ORGUYOSO ATROBE!  

STA. CRUZ - Siman pasa Aruba por a yama BON BINI na nos Gobernador nobo, sr. Alfonso Boekhoudt. Parlamento di Aruba den un reunion solemne a yama Gobernador BON BINI y den nomber di Parlamento y di pueblo di Aruba e presidente di parlamento a hasi esaki na forma eloquente.
Pueblo tambe a yama su Gobernador bon bini y bo por nota cu nos Gobernador a uni un gran parti di nos pueblo den e orguyo un biaha mas di nos hendenan.
Sinembargo ta duel mi di a mira con gobierno di Aruba (AVP) a reacciona riba nos Gobernador. Nan a briya cu nan ausencia pa demostra nan malcontento. Ami tampoco por a acudi ma e ceremonia diahuebs debi na un entiero di un primo dimi, sinembargo, apesar cu e animo no tabata halto, mi a hasi tur esfuerso pa tey presente diabierna na e recepcion si hunto cu mi coleganan di fraccion di MEP.

Pero e reaccion di Gobierno di sr. Mike Eman tabata realmente hopi infantil, mustrando manera un mucha malcria cu no a haya su gusto. Esaki a wordo desaproba pa e gran parti di nos comunidad.

Laga nos no lubida con e proceso di nombracion a bai. Berdad e proceso di nombracion no a bai manera mester ta den cual Hulanda a apunta nos gobernador. Pero esey tabata pasobra (1) Gobierno di Aruba a tarda masha hopi cu propone un candidato, siendo cu nan tabata sa masha bon cu e termino di sr. Refunjol tabata yegando na su final, y (2) Hulanda no a bay di acuerdo cu e nominacion di sr. Angel Bermudez y Aruba no kier a bin cu otro candidato. Esey a tranca e proceso manera tur hende sa, y na dado momento Hulanda saca su conclusion y a tuma un decision. Debi na falta di
Liderasgo di sr. Mike Eman, Hulanda mes a asumi e rol di Liderasgo pasobra no por a warda mas. Ta di lamenta cu sr. Eman ta keda rabia en bes di asumi su rol di Liderasgo bek y demostra grandesa. E gran mayoria di nos lo a hasi esey, demostra grandesa y yama Sr. Boekhoudt bon bini. Pero locual sr. Mike Eman a hasi ta falta respet no solamente na nos Gobernador sino tambe na Rey Willem Alexander.
Cu esaki e ta causa daño ireparabel na e relacionnan den Reino y ta trese duda si e por sigi goberna nos pais. Pasobra si e ta busca confrontacion riba algo cu e mes a causa, con bo por confi'e cu otro asuntonan mas crucial?

E actitud aki di sr. Mike Eman no ta yuda nos pais den nada. Sr. Eman mester cuminsa di pidi disculpa na nos Gobernador y na nos Rey.
Nos cuidadanonan kier sinti nan mes orguyoso bek. Orguyoso di nan pais y di nan gobernantenan. Nos cuidadanonan actualmente ta sinti berguensa pa e forma cu su gobierno ta actuando. Ban cambia esaki. Ban uni y ban hasi nos hendenan orguyoso bek di nos dushi pais Aruba y di su gobierno.

Expresionnan haci den e articulo aki no necesariamente ta refleha opinion di ArenaPoliti.co