Financieramente Gabinete Mike Eman a ruina y destrui nos pais!

Siman pasa Banco Central a publica su “Annual Statistical Digest 2014”, caminda tur cifra y dato estadistico di finanzas publico pa loke ta aña 2014 a bira oficialmente conoci. Ta pesey lo ta recomendabel pa e lider di fraccion di AVP, Baba Herde pa sikiera un biaha den su bida tira un bista den e publicacion aki y p’asina constata pa su mes den ki situacion financiero desastroso su gobierno di AVP a hinca nos pais aden y alavez evalua si e politica di locura di “eerst groeien en dan snoeien” a duna nos pais cierto beneficio financiero.

Entradanan no a aumenta
Partido MEP ta publica un tabel adhunto compila for di e ultimo publicacion di Banco Central den cual por mira e desaroyo di entrada y gastonan di gobierno durante e periodo 2009-2014. Aki por mira cu na 2009 durante Gabinete Oduber nos pais a conoce un entrada total di 1110.2 miyon florin y durante e ultimo 5 añanan di Gabinete Eman e entradanan a yega na apenas 1114.4 miyon florin. Figurabo, un aumento miserabel di 4.2 miyon florin den 5 aña di tempo! Esaki si ta un escandalo di otro mundo, ya cu tur dia Baba Herde ta gaba cu nos pais a conoce un crecemento economico substancial durante e ultimo 5 añanan, pero un y tur por mira cu e crecemento aki no a ser traduci den un aumento substancial di entradanan di gobierno. Tambe den e tabel nos por mira e desaroyo di gastonan di gobierno. Si na 2009 durante Gabinete Oduber e gastonan total tabata 1230.5 miyon florin, danki na e maneho financiero derochado, descabeya y destructivo di Gabinete Eman, e gastonan a aumenta (‘groei’) te na 1487.2 miyon florin na 2014.  Aki lo ta bon pa Baba Herde splica pueblo e motibonan pakico Gabinete Eman a surpasa nan propio ‘Balance Budget Akkoord” (1350 miyon florin) cu 137 miyon florin?

Deficitnan astronomico
Logicamente cu na momento cu e entradanan di gobierno a keda hopi abao y e gastonan di gobierno a crece explosivamente, esaki automaticamente a conduci cu nos deficit financiero tambe a crece den un forma nunca visto. Un crecemento cu den porcentahe di nos GDP a yega te na 8.5% na 2014 y cual ta casi tres biaha e norma Europeo di 3%.
Riba e grafico adhunto nos por mira cu na 2009 durante Gabinete Oduber nos deficit financiero tabata 163.1 miyon florin (SIN conta e 280 miyon florin di BBO di Valero cu gobierno a ricibi na 2010) y esaki a aumenta te na 406.1 miyon florin na 2014. Mester puntra si esaki ta e famoso “groeien” cu Baba Herde constantemente ta papia di dje?

Medidanan cruel na caminda
Sinembargo te cu awe partido MEP no por caba di comprende e logica di Gabinete Eman cu su maneho di “eerst groeien, dan snoeien”, ya cu ta increibel con – despues di un supuesto crecemento economico cu nan a crea  – nan ta cla pa den e proximo aña y decadanan cuminsa corta (“snoeien”) den tur departamento y fundacionnan social. Sinembargo e ministronan actual NO kier baha nan propio gastonan di luho, esta di coordinadornan, consultantnan, viahenan rond mundo, huurnan exagera etc., pero ta preferea di implementa un lista largo di 24 medida cu nan  mes a propone na CFT. Sin duda cu tur e medidanan cruel aki lo corta te den weso di tur ciudadano di nos pais. Hecho ta cu e pueblo Arubano tin cu sacrifica y sufri pa e gobernantenan actual por sigui derocha placa pa nan propio beneficio.

Expresionnan haci den e articulo aki no necesariamente ta refleha opinion di ArenaPoliti.co