Tourism Product Enhancement Fund pa 2015 a keda cla 

Diamars Parlamento di Aruba a aproba cu mayoria voto na fabor e presupuesto di TPEF cu ta e Tourism Product Enhancement Fund pa aña 2015. Ta trata aki di un fondo cu a keda crea na aña 2010 unda cu doñonan di Timeshare ta contribui cu un 2% na mehoracion di Producto Aruba. Cu e fondo aki den transcurso di aña Aruba a conoce varios proyecto cu ta contribui na embeyecimento di nos isla. TPEF a yuda proyectonan den diferente aspecto cu tin un enlace directo cu turismo, por ehempel den e aspecto di medio ambiente, siguridad, cultura, infrastructura y sin laga afo atraccionnan turistico. Proyectonan manera Linear Park, facilidad na beachnan publico manera na Arashi y Surfside, mantencion di limpieza na beachnan publico por ehempel na Baby Beach, Santo Largo, Mangel Halto y Eagle Beach. Adicional na esey a percura pa un proyecto grandi di 100 bari di sushi cu ta poni den zona turistico. TPEF a percura tambe pa programa cultural manera ta e Carubbian Festival. Por agrega tambe e inicio di e proyecto Aruba Certificacion Program unda cu awe mas di 3 mil persona ta certifica pa brinda nos bishitantenan un miho servicio.

Segun ley e fondonan cu no a uza den e presupuesto di aña pasa por pasa pa e aña siguiente, como tal presupuesto di TPEF pa aña 2015 ta conta cu 5 miyon pa mehoracion di Producto Aruba.

Entre e preguntanan a bin dilanti tambe e aspecto di control riba e presupuesto di TPEF. Esaki tin un maneho completamente diferente, mirando cu e fondo ta maneha completamente pa Departamento di Finansas. Cuentanan anual di 2010 y 2011 ya caba ta entrega na Parlamento. Ta trahando di serca cu CAD riba e otro cuentanan anual di 2012, 2013 y pa sigui cu e preparacionan pa 2014 tambe.

Minister Oduber a keda hopi satisfecho cu miembronan di Parlamento di Aruba ta mira e importancia di e Fondo aki. Un fondo cu antes oposicion kier a te hasta kita, awe propio miembro di e fraccion aki ta pidi pa aloca fondonan den por ehempel enseñansa pa conscientisa nos hobennan riba e importancia di Turismo pa Aruba. Sr. Oduber ta bisa: “Mi ta kere cu poco poco e meta cu nos a pone nos dilanti pa convence e existencia di e fondonan aki ta yegando e destinacion.”

Expresionnan haci den e articulo aki no necesariamente ta refleha opinion di ArenaPoliti.co