ORANJESTAD- Aruba ta riba e bon caminda pa loke ta su deficit presupuestario. Esaki ta loke Prome Minister Mike Eman a trece dilanti den un entrevista na Canal 90. Apesar di tur loke ta wordo bisa y insinua, cosnan ta otro y muestranan tey. Den e ley cu a pasa den Parlamento di CAFT, a pone bon cla e normanan na cual gobierno di Aruba mester tene su mes. “Den e ley cu algun luna pasa a keda trata y aproba den Parlamento, ta poni explicitamente cuanto e deficit den e añanan 2015, 16, 17 y 18 mag di ta. Na 2015 e mester ta 3.7%, na 2016 2%, na 2017 na 0,5% y na 2018 0,5% plus.”

Ta importante pa enfatisa cu ora papia di e normanan aki mester wak con na paisnan Europeo 3% di  nan deficit ta loke ta aceptabel. Remarcabel ta cu hopi pais na Europa (entre nan un pais grandi manera Francia)  no a yega e norma aki ainda. Hulanda mes a lucha hopi pa por ta bou di 3% di deficit.

CAFT 
Na 2014 CFT a anuncia cu Aruba tabatin un deficit presupuestario di 9 y pico %. Eman: “Esey no tabata full corecto, pasobra na 2014 gobierno a hinca un suma grandi den APFA pa por a trec’e bek na un dekking di 100% pa garantisa e fondo di pensioen cu tabata na 60%. Mescos a haci cu fondo di AOV y di AZV pa por a sigura nan existencia. E deficit tabata realmente na mas o menos 5%. Gobierno a traha duro y diehuebs den Parlamento a pasa un presupuesto supletorio cu a keda na exactamente 3.7%. Den su conseho Raad van Advies ta mustra cu esaki ta e caso tambe. Esaki ta algo hopi importante, mirando e situacion cu Aruba a hay’e aden na fin di 2009. Nos a inverti den calidad. Di bario, scolnan, centro di ciudad, a construi un Linear Park y hopi mas pa asina stimula economia. Nos a inverti grandemente den nos hendenan cu entre otro aumento di bijstand, introduci schoolkinderentoeslag, reparatietoeslag pa esnan cu un entrada bou di 2500 florin, reparatietoeslag pa pensionadonan.” Eman ta contento cu a logra yega na un deficit di 3.7%, pero na mes momento ta realisa cu ainda tin hopi mas pa haci. “Nos a logra esaki sin mester a introduci medidanan pisa cu mester a wordo carga door di comunidad.”

CITGO
Eman a bisa cu e team di CITGO ta na Aruba y Minister de Meza hunto cu su conseheronan ta negoshando cu e ekipo. Eman: “Presupuesto 2016 a yega Parlamento, pero nos a pidi Parlamento y CFT pa duna nos un luna di tempo, pasobra si yega na un acuerdo cu CITGO esaki ta cambia presupuesto 2016 y lo mester haci e ora un nota van wijziging.” Presupuesto 2016 mester cumpli cu 2% di deficit segun e normanan defini. “Evaluacion di CAFT ta bisa cu e presupuesto entrega no ta na 2%, pero 2.9%. Esaki ta bou di esun di Hulanda y un rebaho substancial cu esun di 2014 y bayendo den un direccion positivo.” Tur esaki sin medidanan adicional.

Expresionnan haci den e articulo aki no necesariamente ta refleha opinion di ArenaPoliti.co