“Simplemente bo no por compara MEP cu AVP” 

Nos a tuma nota cu prome minister a declara cu bo no por compara e periodo di gobernacion entre AVP y MEP. Enberdad esaki ta e caso tambe pasobra bou mando di AVP nos pais lamentablement a conoce e desaroyo financiero mas malo di nos historia. E desaroyo aki claramente tin di haber cu e maneho  financiero iresponsabel y di libertinahe den gastamento di placa di AVP. Den e comunicado aki nos lo compara e maneho financiero cu algun indicadornan.

Ta importante pa remarca cu durante gobernacion di MEP nos pais a conoce un surplus 2 biaha uno di 4.8% & 1.0% (2003 & 2008) durante e periodo di gobernacion. Remarcabel ta cu nos pais desde su Status Aparte nunca a conoce surplusnan cual esakinan tawata e unico. Entre e periodo di 2002-2009  e deficit averahe (di presupuesto) bou di MEP tawata -1,56%  mientras cu bou di AVP e deficit averahe aki ta -7.56% cual ta 7 biaha mas! Desde cu AVP a tuma mando nos pais for di 2010 a conoce unicamente deficitnan financiero. Na 2 occasion 2012 & 2014 e deficitnan aki tawata record mundial -9.8% (2012) & -9.3% (2014). Entre añanan 2002 y 2009 e deficit financiero acumula bou di MEP tawata 682.3 miyon cual pa aña ta un averahe di 85.3 miyon. Mientras cu bou mando di AVP e deficit financiero acumula entre e periodo 2010 y 2014 tawata di 1.733,8 miyon cu ta un averahe di 346.8 miyon pa aña! Loke bo por conclui di esaki ta cu e averahe di deficit durante e periodo di gobernacion di AVP di 5 aña ta 4 x mas hopi cu 8 aña di gobernacion di MEP.

Pa loke ta trata e nivel di debenan esaki tawata bastante nivela y stabil entre e periodo di 2002-2009 bou Gabinete Oduber e tempo ey. Na 2002 esaki tawata 47.6% y na final di gobernacion na 2009 esaki tawata 49.9% cual ta un diferencia di 2.3% den un periodo di 8 aña. Si compara esaki cu AVP na 2010 a sera e aña cu un debe nacional di 56.1% y na 2014 esaki a conclui na 80.8%.  Dus den apenas 5 aña Gabinete Eman I & II a aumenta esaki drasticamente te na 80.8%. Pa colmo mester remarca cu e presupuesto 2015 tin un deficit  cu lo manda e debe nacional ten a 81.7%. Esaki ta prueba concreto cu e debe nacional ta sigui crece so enbes di baha.Di 2009 pa 2014 nos debe nacional a aumenta drasticamente!

No solamente a base di e desaroyo financiero bo por hasi un comparacion pero tambe a base di e situacion actual. Realidad ta cu aunke Promer Minister kier pretende cu e la haya pais Aruba cu su finansas deteriora  na 2009 e cifranan presenta ta demostra lo contrario. Banda di esaki no mester lubida cu nos pais nunca a yega di haya un KB pa cu maneho financiero cual basicamente a mustra e incapacidad den e maneho financiero di nos pais. Pero pa corona e obra awe nos ta papia di supervision financiero algo cu nunca antes a yega di pasa. Lamentablemente e supervision aki kier of no ta “mara man y pia” di nos pais  pa cu su propio maneho.

Promer minister sa masha bon cu e no tin pia pa para riba dje pasobra e cifranan presenta y e hecho awendia nos pais ta bou supervision financiero ta duna e mensahe cla cu su Gabinete Eman a gasta placa sin control y no por a maneha fondonan publico durante 5 aña. E parti mas tristo di esaki ta cu no ta mustrando cu accionan cla cu nan lo ta dispuesto pa hala faha mara serca nan mes promer cu opta pa e caminda facil cu ta suta pueblo cu medida!

Expresionnan haci den e articulo aki no necesariamente ta refleha opinion di ArenaPoliti.co