STA CRUZ - "Siman pasa tabata un siman interesante. Minister Bermudez a dicidi di informa Parlamento cu e ABB lo bira 7%. Mike Eman a spanta y mesora a saca un articulo bisando cu ta invento si MEP. Pero ora ela realisa cu locual minister Bermudez a declara ta graba, ela cambia su storia te cu Eman a pone prohibicion riba Bermudez cu minister Bermudez no por papia mas di e tema aki. Cosnan asina bo ta mira pasa solamente na Aruba bou gobierno di AVP. Pasobra AVP ta e partido cu ta custuma di manipula tur cos y no por papia berdad.
Con un prome minister ta prohibi un minister di finansas pa papia? Acaso e no tin confiansa mas den Bermudez? Si esey ta e caso, e mester manda Bermudez cas! Pero e no ta hasi'e pasobra e sa cu e no por sin un persona cu si sa di finansas.
Locual Mike Eman a hasi ta un acto di cobardia. Den su EMAN-landia cosnan asina por pasa. Pero aki na Aruba, no!
Pesey mi ta reta Mike Eman pa e sali y bin bisa pueblo kiko e tin warda pa pueblo: ABB? Of aumento di BBO? Of con otro e ta bai regla e desaster financiero cu e mes a causa? Ta tempo pa Mike Eman mustra siquiera un tiki curashi y enfrenta e pueblo. Y ainda mi reto pa un debate no a wordo contesta. Mike Eman, Ban debati riba bo vision pa rescata e pais aki y riba e vision di MEP pa solucionnan duradero pa Aruba" Evelyn Wever-Croes a declara.

Expresionnan haci den e articulo aki no necesariamente ta refleha opinion di ArenaPoliti.co