No ta promer biaha cu promer minister Mike Eman ta silencia minister Bermudez di finanzas y pone pasa pa ridiculo y humiye. Minister Bermudez mes ta mustra un hende cu a cuminsa cansa di weganan di Mike Eman. Recientemente minister Bermudez a declara cu ta forma parti di un circo politico y tambe cu e mester baila manera cu gobierno ta toca. For di anja pasa gobierno y muy en especial minister Bermudez tawata preparando mas medida contra pueblo den forma di un reforma fiscal. Nan a busca professor Vermeend for di Hulanda pa forma y guia un commission pa bin cu proposicionan concreto con pa logra esaki. Den parlamento mes nos a haya varios prensentacion di e reforma aki. Durantre e presentacionan den parlamento a bira obvio cu gobierno kier introduci un Algemene Bestedings Belasting (ABB) pa reemplaza BBO. Gobierno tin e debe y obligacion pa informa nos pueblo cuanto placa e commission aki a costa nos pueblo. Un di esnan cu ta den e commission a viaha bai Hulanda bai bin y pueblo ta paga anto pa awe resulta cu e commission su trabou nunca mester a wordo haci. Mike Eman mester stop cu su wega politico pasobra e la perde tur clase di credibilad caba. Ta kende ainda pork ere, kiermen ora e bisa ABB no ta bin ta e ora ABB lo bira realidad.
E mesun gobierno cu a priminti pueblo cu lo elimina BBO a prepara un aumento drastico di BBO pa pueblo den forma di ABB. Loke pa lunas nunca gobierno kier a divulga tawata e procentahe cu ABB lo mester bira. Diaranson cu a pasa parlamento a trata e cuentanan annual di pais Aruba di anja 2013. Ta importante pa pueblo ta informa tocante e jaarrekening 2013 paso esaki ta e refleho bek riba e presupuesto cu ta wordo entrega. E ta den cuadro di transparencia y ta importante pa e pueblo sa kiko ta wordo haci pa su placa. Ta importante pa pueblo sa con su placa tawata wordo malgasta desde cu e gobierno aki a asumi nan responsabilidad. Cu e jaarverslag aki e pueblo por a wak pa su mes con e situacion tawata na anja 2013 y por huzga pa nan mes kiko a wordo haci cu placa di pueblo desde 2013. Durante e reunion publico aki nos fraccion a puntra minister Bermudez ki percentahe e ABB lo bira. Minister Bermudez a contesta cu e ley ta cla y cu e percentahe lo bira 7%. Nos mester informa pueblo cu e ley ABB tawata cla y cu conseho di minister mes a aproba esaki. Ora minister Bermudez a anuncia e percentahe Mike Eman su fusenan a bula y mirando e reacionan den pueblo a corre bai prensa apenas algun minuut cu e reunion a caba y bisa cu ABB NO ta bai door.
Mike Eman a priminti pueblo cu e lo elimina BBO. Den parlamento minister Bermudez ta CONFIRMA cu BBO lo bira 7% den forma di ABB. Apenas cu reunion a caba ata Mike Eman ta declara cu ningun impuesto ABB ta na caminda. E circo politico aki ta yegando su fin y a yega momento pa minister Bermudez entrega su retiro y bai disfruta di su pensioen pasobra no ta systema con Mike Eman ta trate y ridiculise. Dikon Mike Eman mes no ta tuma e cartera over di finanzas! Un dia despues Mike Eman a prohibi Bermudez papia riba e topico ABB. Mi ta kere cu esaki minister Bermudez mester tene honor na su mes y entrega su retiro. Mike Eman a humiya minister Bermudez y awor te hasta a kita su autoridad. Awor ta bai asina lew di hasta prohibi minister Bermudez di papia. Ta cuanto gobierno tin den un gobierno? Berguenza esaki ta pa nos pais y mas berguenza pa un hende di edad manera minister Bermudez cu den nos opinion e mester bai mirando con e ta wordo trata!

Expresionnan haci den e articulo aki no necesariamente ta refleha opinion di ArenaPoliti.co