Durante tratamento di Presupuesto 2017 nos a dedica tempo na ilustra kiko te awor aki ta e saldo di e mal maneho di Minister Eman y su bende. Aruba na man di Gabinete Eman ya no ta mescos mas. Minister Eman a destrui nos Pais riba diferente frontera. Nos autonomia, nos florin, nos naturalesa, nos identidad y nos trankilidad, tur a wordo destrui na man di Eman. Den un serie di 4 articulo nos lo amplia riba e destruccion haci. Esaki ta e di 4 y ultimo articulo. Aki den nos ta sigi amplia riba e destruccion di e trankilidad den gobernacion di nos Pais. 

Den gobernacion tampoco tin trankilidad 
Den e articulo parti 3 nos a cuminsa amplia riba e abusonan cu e Ministernan di Gabinete Eman a haci na momento cu a presenta e vacuum den liderato cu e ausencia di Minister Eman a trece cune na nos Pais. Aki nos ta sigi cu e otro Ministernan. Minister Paul a fiesta cu permiso, unda cu secretaria mes lo ta cobra 6 mil pa permiso y ya no por traha mas eynan, unda cu permiso ta wordo regla via whatsapp y fiesta na Houston pa deal den e refineria via stroman. Minister Sevinger ta abusa di e Pasi aki grandemente te cu awor na DIMAS tin hende di IND Hulanda ta cana parti ordo. Su coordinador principal no por drenta DIMAS mas y awor hunto cu e secretaria di partido AVP na DIP, por keda haci deshaci cu fiesta cu tereno na nos Pais. Ex Minister Otmar aunke ela retira manera djaca cu ta bula promer cu barco zink, tambe a haya man zwak di Eman pa haci deshaci. E mandatario a sconde su abuso tras di stroman pa disfruta di fondo y oportunidad publico. E ex Minister tabata tin curashi si pa bisa e berdad cu Minister Eman no ta un lider y cu e ta zwak y cu e no por pone orden. Pero den tur e caos ey e ex Minister aki tambe a goza di ATA Bank, Arubusgate, Aruparking, Santa Rosa y mas pa campaña pa keda y pa bolbe bek na poder. Sin lubida cu hunto cu Eman a caba cu comercio den Caya Betico Croes cu nan klem y parkeermeters. Minister Bermudez a yega laat, e bus a bay lage promer, pero asina mes e mandatario a percura pa pone algun hende na lugarnan strategico pa asina por move mundo pa Minister Eman por keda na poder. Asina Minister Bermudez a permiti 230 nombracion politico na e buronan di Ministernan sin haci nada contra. De bes en cuando Minister Eman a klem e mandatario su boca y e propio Minister Eman a percura pa kima e mandatario aki como nos posibel Gobernador nobo. Pero esey bo ta haya ora cu un lider no ta lidera y ta zwak. Tur e caos aki den gobernacion ta destrui e trankilidad di nos Pueblo.

Pueblo mester rechasa e destruccion aki
Esaki tabata e ultimo parti di un serie di 4 articulo den cual nos a ilustra con Minister Eman a destrui nos Pais riba diferente frontera. Nos no por sigi asina. Aruba merece e trankilidad cu ta destingi nos Pais. Pueblo mester rechasa e destruccion cu Minister Eman y su bende a haci na nos Pais. No cay pa promesa falso, e realidad di su destruccion na nos Pais ta bisto y e ta den nos man pa para e destruccion aki di nos dushi Aruba.

23 november 2016

Expresionnan haci den e articulo aki no necesariamente ta refleha opinion di ArenaPoliti.co