Benny Nisbet (PPA): “Tres decada di signatura AVP/MEP y ningun semiya pa un pilar economico nobo a worde planta !!”
![Nisbet01](/images/2016-press/Nisbet01.jpg)
No kabe duda cu e hecho cu e anja aki Aruba ta recorda cu ta 30 anja pasa cu Aruba a drenta nos Status Aparte den Reino Hulandes y cu e autonomia aki lo mester a pone gobernacion arubano completamente den man local pa nos guia y stimula e.o. nos economia arubano.
Realidad ta cu Aruba a hana un bunkerstation na 1920 cual a bira un refineria pa 1927 y cual a bira e unico pilar economico pa hopi tempo. Esaki tabata den e periodo colonial !!
Na 1954 cu Statuut di Reino Hulandes a drenta na vigor te cu awe cu Aruba tin su Status Aparte e pregunta ta kiko a diferente gobiernonan den e epoca di 60 anja a planta cu a desaroya su mes den un pilar economico for di cual nos pueblo por biba y consecha ?
E unica ta e semiya cu gobernacion di PPA bao di sr. Juan E. Yrausquin (q.e.p.d) a inicia, guia y pa cual a presenta y goberna basa riba un vision hopi cla. Pesey dentro di un of dos decada di gobernacion di PPA turismo arubano a desaroya su mes dentro di un pilar economico. E vision di PPA tabata asina cla cu sr. Juan E. Yrausquin (q.e.p.d) tabata bisa hopi cla esta cu turismo lo mester desaroya mes pa e momento cu nos refineria sera su portanan pa asina turismo mantene e economia di aruba …den ausencia di un refineria. Y justamente esaki a sosode na dos occasion kaba ..esta ora cu Lago(Exxon) a sera su portananna 1984(bao di gobernacion di MEP) y ora cu Valero a sera su portanan na 2012 (bao di AVP). Aruba a keda cu un solo pilar economico esta turismo inicia pa PPA !!
Trinta anja largo (tres decada largo) dos signatura a goberna pais Aruba esta signatura di MEP durante di cuatro (4) gobierno y signatura di AVP durante di cinco (5) signatura di gobernacion. E pregunta ta kiko tabata e maneho economico di ambos ?? Kiko a desaroya su mes den un pilar economico extra pa pais Aruba ? Te na e momento aki nada !! Esey no kiermen cu nada bon of positivo lo no a tuma lugar durante nan diferente gobernacionan pero no a semiya cu por a crea un di tres pilar economico pa futuro di generacionan cu lo sigui nos.
Hasta riba tereno di Turismo tabatatin masha poco ‘iniciativa’ pa logra diversificacion di nos producto turistico y e servicio cu nos por brinda exterior. Un di e iniciativanan mas dinamico cual a brinda un desaroyo diversifica pero dentro di e product turistico aruba tabata e ‘iniciativa’ di mi persona como Ministro di Transporte cu mi (PPA) a funda AIR ARUBA cu a bira nos compania nacional y cu tabatatin un impacto economico den cupo di trabao y a contribui pa mantene e costo di un pasashi abao pa nos destinacion arubano. Ora cu bao di AVP a manda ‘Air Aruba’ bancarota un 800 persona directo y indirecto a perde trabao…..un instrumento di crea devizas a bai perdi y na e momento ey AIR ARUBA tabata responsabel pa trece casi 30 % di nos turismo aruba. Te dia di awe ningun otro compania di aviacion no a logra e ‘posicion y rol’ di Air Aruba mientras e prijs di un pasashi pa e destinacion Aruba a subi cu mas cu 100 % den e par di anja cu a pasa !!
Algun dia pasa mi por a sinta dilanti Television y wak e programa di ‘leuw for di cas’ y scucha e diversificacion di estudio di nos studiantenan arubiano ora cu nan a jega hulanda. Mi por a bisa…esaki lo regresa aruba y esaki casi sigur lo mester keda biba den exterior cu e estudio cu el a scoge !! Pakiko ? Pasobra simpelmente un economia basa riba un solo pilar economico of si e Upgrader habri dos no ta duna espacio pa tur e diversificacion di estudio cu nos studiantenan a scoge.
Pesey ta importante pa un pueblo realisa cu nan escogencia ora cu tin eleccion ta determina na mes momento e futuro social-economico di nos pais y e posibel desaroyo economico cu nos pais lo por tin den futuro. Ora un partido presta vision y projecto di otro jamas e ta logra ejecutanan manera debe ser !!
ARUBA ‘HUB DEN CARIBE’…….!
E unico partido cu casi 30 anja largo a accentua cu mester prepara pa poseciona Aruba pa bira un HUB den Caribe tabata partido PPA. E tabata y ta e curazon economico di nos programa politico !! Lastima cu durante e 30 anja cu a pasa pueblo su mandato na PPA tabata hopi limita. Durante e ultimo dos gobernacion di gabinete Mike Eman por bisa cu AVP a presta e vision y varios projecto di programa di PPA !! Pero manera nos ta bisa semper un vision presta no ta garantia pa un vision bon ejecuta !! Y esey ta exactamente locual a pasa durante e periodonan(8 anja) cu ta terminando pa 2017.
POSIBEL ‘SEMIYA’ PA PILARNAN ECONOMICO DEN PROGRAMA DI PPA !!
ARUBA como HUB den Caribe ….entre Caribe y Sur y Norte America …Caribe y paisnan Asiatico y Caribe y paisnan Europeo.
- Nos Aeropuerto mester worde desaroya den un HUB caribense !!
- Nos mester desaroya un haf cu ta cumpli cu e criterio nobo pa por ricibi e ‘post panama vessels’ cu tin un profundidad di 16 meter….Ni haf di Oranjestad, Ni haf di Barcadera no ta cumpli cu e criteria aki solamente un parti di haf di San Nicolas !! Mientras e apertura di e Panamakanaal cu su ‘slotnan’ nobo ta crea oportunidad economico nobo pa esun cu prepara y planifica pa esaki.
- Aruba lo NO mester asumi e rol di un Upgrader pero sea e rol di un refineria of e rol di construi Barco y duna servicio na Barco….esta un Shipping industry y Shipservices…..for di parti di e tereno cu gobierno lo por tuma bek pa esaki !!
- Nos mester crea un Aruba World Trade Center preferiblemente usando un parti substancial di e tereno cu ta bin liber den of alrededor di haf di Oranjestad !! Esaki por permiti Aruba pa bira participante den e proceso di ‘internacional trade’’ creando un diversificacion di cupo di trabow. !! Mester crea un Universidad Regional/Internacional cu tin e.o. e facultadnan di Idioma y di IT….(E commerce) etc…..!! Preferiblemente lo mester mara esaki na e Aruba World Trade Center y nos mester crea espacio pa DOS business hotels pa sostene e Aruba World Trade Center !!
- Nos mester studia y prepara un planta di Television Regional/International…. cu lo funciona for di Aruba pero lo duna noticia di mas isla/pais den region diariamente …..!! Esaki lo duna Aruba un instrumento y un rol importante den region.
- Nos mester studia y prepara pa mas desaroyo riba tereno di Telecomunicacion arubano…eventualmente un hub di telecomunicacion..esaki tambe lo contribui na e ‘rol’ importante di Aruba den region e momento ey !!
- Den un esfuerzo pa diversifica nos producto turistico PPA ta keda accentua necesidad di inverti den * Convention tourism * Golfersdestination * Health & Wellness * San Nicolas, Our Caribbean Town y Aruba como ‘shoppingdestination’ pa no lubida desaroyo di Aruba como destination di turismo di yate….!!
E final di e periodo cu constitucion ta duna cualkier gobierno ta jegando pa gabinete Mike Eman….su resultado ta hopi cla un Debe Nacional enorme, consecuencianan devastador di hedging…..un posibel Upgrader na San Nicolas en vez di un direccion nobo cual a worde priminti …..na pueblo di San Nicolas.
PPA ta di opinion cu a keda demonstra durante tres decada esta 30 anja cu e dos signatura cu a goberna nos pais no a logra crea un of mas pilar economico pa pueblo di Aruba y e generacionan cu lo sigui nos. Analisando e diferente articulo cu ta worde presenta PPA ta di opinion cu PPA lo por ta un alternative serio pa nos comunidad arubano. Aruba mester planta mas ‘semiya’ pa por crea pilarnan economico acerca. E presencia di e pilarnan economico aki lo soluciona diferente problema serio cu gabinete Mike Eman y otro a crea den curso di tempo. Pa logra esaki e pueblo mester prepara su mes pa un cambio dramatico den politica arubano. Simpelmente e tempo pa kibra e cadena a jega !!
Aruba, 8 augustus 2016 Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co