SAVANETA -- Dilanti un Cede di MEP na Savaneta completamente yen, lider di partid MEP sra. Evelyn Wever-Croes a duna homenage na 300 cacique y Lider di Bario cu a campaña cu Betico Croes. Na e ocasion aki lider di MEP a duna un discurso cu a emociona hopi, y a impacta hopi mas. Despues di tene 1 minuut di silencio den memoria di esnan cu ya no ta cu nos mas, Evelyn Wever-Croes a gradisi Cacique y lidernan di bario pa nan contribucion, balentia y sosten incondicional duna na MEP y Betico durante e lucha pa nos libertad. El’a menciona cu como mucha e ta corda esnan cu tabata yuda cose bandera, esnan cu tabata encarga cu e barco di libertad, esnan cu a cuida Betico, su chaffeurnan, su conseheronan. Otronan cu a wordo maltrate hasta herida den e lucha pa nos libertad.  Tur e lidernan di bario rond Aruba, cu a campanja cu Betico cas pa cas pa por a uni e pueblo aki pa por a realisa nos Status Aparte.

Lider di MEP a ofrese su disculpa si acaso e reconosemento y gratitud por a tarda un poco pero awe esaki ta un realidad y dia 18 di maart nos lo continua cu mas reconosemento mirando cu Betico tabata tin asina tanto hende cu a stime y a yude den tur skina di Aruba. Tambe el’a remarca cu talves den pasado por tabata tin cualkier motibo cu por a pone nan of un familiar aleha di MEP, kisas dor di trabaonan di tur dia di e politiconan, y cu MEP por a perde un poco contacto. “Nos lo hasi nos maximo esfuerso pa consolida e base di nos partido y traha riba esaki pasobra e partido aki ta di boso, boso a pone e fundeshi y nos generacion awe tey pa conserve. Hunto nos por sigui hasi cosnan grandi pa Aruba” segun Evelyn Wever-Croes.

Finalmente Lider di MEP a hasi un apelacion fuerte na cada un presente en bista di e eleccion e anja aki, cual ta uno di sumo importancia, pa duna MEP e sosten masal un biaha mas. “Si tin hende pa cualkier rason por a bira lomba pa MEP mi kier pidi bosonan como Cacique y  lidernan di bario boso compromiso pa ban bek na e mesun amor di antes y papia cu nan y combense nan di e importancia di proximo eleccion garantisando nan sosten bek na MEP.
Nos pais ta pasando den momentonan sumamente dificil y pesey mi ta hasi e apelacion aki na boso, pa hunto nos cambia rumbo di nos pais, y hunto nos pone Aruba bek riba e rumbo di bienestar y progreso pa tur. Mescos cu tempo di Betico y di tempo di Nel, cu e ser humano ta wordo poni central atrobe.

Betico tabata un persona hopi especial y nos ta hopi orguyoso di por a conose un lider asina grandi. Betico a laga nos cu su palabranan legendario: “si mi cai na caminda, gara e bandera y sigi cu e lucha, cual ta locual cu boso a hasi schouder cu schouder cun’e. Y awor mi ta pidi boso pa sigi hasi’e schouder cu schouder cu nos partido MEP.
Dia 24 nos a hasi e prome grupo di homenage, y nos tin hopi grupo mas pa homenagea, pero nos mester a cuminsa un caminda. E sigiente grupo lo wordo homenagea dia 18 di maart, y asina e sigiente lunanan nos lo continua. Nos ta pidi nos baluartenan pa carga poco pasenshi, nan tambe ta yega na beurt.
Finalmente mi kier bisa lo sigiente: laga nos no lubida nunca kiko Betico a significa pa nos, y ban lucha hunto pa trese e temponan ey bek pa nos yiunan y nan yiunan por crese den libertad, den siguridad y cu dignidad”, lider di MEP Evelyn Wever-Croes a termina bisando. 

Expresionnan haci den e articulo aki no necesariamente ta refleha opinion di ArenaPoliti.co