DEN PARLAMENTO. 

ORANJESTAD – Lider di MEP Evelyn Wever-Croes den Parlamento dialuna, a duna un discurso hopi elocuente den cual el’a adresa e tema di e matrimonio di personanan di mesun sexo y e union civil. Na prome lugar, si critica tabata riba Mike Eman y gobierno cu a keda hopi distante di tur esaki. 
El’a splica tambe dicon e amienda di sra Desiree Croes no ta carga su aprobacion, pero mesora a ofrese alternativanan. Alternativanan cu ta logra e derecho igual na un forma mas liher y mas sensiyo, sin mishi cu e instituto di matrimonio. Por cierto, a surgi un discussion cu sra Desiree Croes, ora el’a ofrese esaki. “Mi a splica sra. Desiree Croes cu matrimonio entre esnan di mesun sexo e mes a kita for di riba mesa, pues ta keda e derechonan igual por ehempel ora di herencia, di pensioen, di alimentacion, etc. mi a ofrese pa hunto nos traha riba elimina discriminacion riba e terenonan ey, y logra derecho igual. Si tsa di berdad sra. Desiree Croes kier logra derecho igual, tin un otro caminda pa logra esaki, y esey mi a ofrese pa nos cana e caminda aki hunto. Sinembargo sra. Desiree Croes a rechasa e oferta, demostrando cu p’e no ta derecho igual ta primordial, sino e cos mester bai manera cu e kier. Y e sa cu e forma con e kier hasi’e, lo no logra e meta cu e kier. Nos lo traha riba dje toch, y presente otro siman”, lider di MEP a duna di conose.

UNION

Na final di su discurso el’a hasi un yamada na union. “Finalisando mi kier dirigi mi na henter nos comunidad. E tema di matrimonio entre personanan di mesun sexo, ta un tema delicado. E tema di derecho igual ta un tema cu nos mester atende como comunidad, pero cu respet. Tanto den nos actonan y sigur tambe den nos palabranan. Nos pais ta para dilanti retonan hopi grandi, y ta hunto nos mester enfrenta e retonan aki. Retonan grandi, manera pobresa cu ta aumentando, mas mucha cu ta bai scol si come un desayuno; muchanan cu ta wordo abusa sexualmente, criminalidad cu ta asotando tur tur caminda y ta birando mas violento; desempleo cresiendo cu ta causa mas problema social.
Irespecto religion of orientacion sexual, nos tur ta experiencia e retonan aki un momento of otro, y ta hunto nos mester enfrenta e retonan aki. Mi ta compronde cu emocionnan por bai halto, pero semper corda cu nos tur ta famia den e comunidad chikito aki, y mayan nos tur mester di otro pa hiba nos pais padilanti”, lider di MEP a clausura su presentacion, y a ricibi un aplauso fuerte di publico den tribuna.

Expresionnan haci den e articulo aki no necesariamente ta refleha opinion di ArenaPoliti.co